Қирғизистон президенти Садир Жапаров Марказий Осиё давлатлари билан алоқаларни мустаҳкамлаш Қирғизистон учун устувор вазифа эканини айтди. Бу ҳақда у 19 сентябрь куни Нью-Йоркда бўлиб ўтган БМТ Бош Ассамблеясининг 78-сессиясидаги чиқишида гапирди.
“Марказий Осиё давлатлари билан муносабатларни мустаҳкамлаш мамлакатимиз учун энг олий устувор вазифадир”, — деди Қирғизистон президенти.
У сўнгги йилларда минтақавий ҳамкорлик “ҳамма йўналишда изчил ривожланиб бораётганини” таъкидлади.
Жапаров Марказий Осиёни ягона геоиқтисодий макон ва халқаро ҳамжамият учун “геосиёсий воситачи” сифатида кўришини таъкидлади. Минтақадаги тўлиқ интеграция йўлида давлат чегараларини қонуний расмийлаштиришни якунлаш зарур, деб ҳисоблайди Қирғизистон раҳбари.
У декабрь ойида қарийб 30 йиллик музокаралардан сўнг Қирғизистон ва Ўзбекистон ўртасида Давлат чегарасини ҳуқуқий жиҳатдан расмийлаштириш бўйича битим имзоланганини эслатди.
“Биз барча қўшниларимиз билан тинчлик, тотувлик ва дўстликда яшашни хоҳлаймиз”, — деди президент.
Унинг сўзларига кўра, Қирғизистон ҳар доим зиддиятли масалаларни фақат тинч, дипломатик йўллар билан ҳал этиш тарафдори бўлиб келган.
“Биз ҳеч қачон бировнинг мулкини тортиб олишга интилмаганмиз, лекин ҳеч кимга она юртимизнинг бир қаричини ҳам бериб қўймаймиз”, — деди Жапаров.
Қирғизистон президентининг сўзларига кўра, бугунги кунда ривожланаётган мамлакатлар олдида икки томонлама муаммо – уларнинг ривожланишига сармоя киритиш ва айни пайтда иқлим ўзгаришига мослашиш зарурати турибди. 2015 йилда эълон қилинган Париж келишуви бўйича йиллик молиялаштириш даражаси энди етарли эмас, бу миқдорни ошириш керак.
Президентнинг айтишича, у ўз ҳамкорларидан ташқи қарзни экологик лойиҳаларга айирбошлашни сўраган, бироқ аксарият ривожланган давлатлар жавоб бермаган.
“Фақат Германия ҳукумати 15 миллион евро қарздан кечди”, — дея қўшимча қилди Жапаров.
Глобал иқлим ўзгариши нуқтаи назаридан, тоғли ҳудудлар айниқса заиф. Қирғизистонда тоғлар мамлакат ҳудудининг қарийб 94 фоизни эгаллайди. Марказий Осиёда иқлим ўзгариши музликларнинг интенсив эришига олиб келди. Агар илгари 2050 йилга бориб Қирғизистондаги музликлар майдони икки баравар қисқариши, 2100 йилга келиб эса улар бутунлай йўқ бўлиб кетиши башорат қилинган бўлса, энди бу жараён тезлашади, дейишга асос бор.
“Бу бутун минтақада муаммоларнинг кескинлашишига олиб келади: ичимлик суви ва қишлоқ хўжалиги учун сув етишмаслиги, тупроқнинг деградацияси, озиқ-овқат хавфсизлигига таҳдид солади”, — дея огоҳлантирди давлат раҳбари.
У халқаро ҳамжамиятни шу ва бошқа муаммоларни ҳал қилиш учун кучларни бирлаштиришга чақирди.
“Биз, БМТга аъзо давлатлар, ўз ташкилотимизни можароларнинг олдини олиш, муросаларга эришиш, тинчлик ва тотувликни ўрнатиш учун барча ишни қилиш бўйича глобал саъй-ҳаракатлар марказига айлантиришимиз керак”, — дея хулоса қилди Қирғизистон президенти.
Изоҳ (0)