Қирғизистон президенти Садир Жапаров республиканинг 20-30 йиллик келажагини олдиндан кўра билиш қобилиятига эга эканини айтди. Бу ҳақда у “Кабар” ахборот агентлигига берган интервьюсида гапирди.
“Мақтаниш эмасу, лекин мен 20-30 йилдан кейин мамлакатда нималар бўлишини, у қандай ривожланишини олдиндан кўра оламан. Одатда прогнозларим тўғри чиқади. Балки бу хислат менга юқоридан берилгандир. Аниқроғи бу қобилият ҳаммага берилган”, — деди Қирғизистон раҳбари.
Унинг сўзларига кўра, “шунчаки, ҳозир нималар бўлаётганини кузатиб, келажак ҳақида хулоса чиқариш мумкин”.
“Мақсадларимизга албатта эришамиз. Бунинг учун ҳар биримиз кечаю кундуз узлуксиз ишлашимиз керак”, — қўшимча қилди давлат раҳбари.
Аввалроқ Қирғизистонда кўпкари финалидан сўнг оммавий тартибсизлик юзага келгани, Садир Жапаров ҳам воқеа жойида бўлгани ҳақида хабар берилганди.
Изоҳ (0)