Қирғизистон президенти Садир Жапаров “Кабар” ахборот агентлигига берган интервьюсида “Озодлик”нинг Хитой Кампирободдан Фарғонага ичимлик суви етказиб беришни молиялаштирмоқчилиги ҳақидаги маълумотига изоҳ берди. 

Жапаровнинг сўзларига кўра, журналистлар “Кампиробод илгари Қирғизистонга қарашли бўлган”, дея одамларни чалғитмоқчи бўлган.

“Улар тўғриланмайди. Ёки эгалари уларга кучли кўрсатмалар беради. Қирғизистон ва Ўзбекистон ўртасида келишмовчиликлар бўлишидан уларга қандай фойда борлигини билмайман. Озодликнинг худбин ниятлари яққол кўриниб турибди, улар қирғиз ва ўзбеклар ўртасида нифоқ солишга уринган”, — деди у.

Қирғизистон президенти Ўзбекистон анчадан бери Кампирободни 100 фоиз назорат қилиб келаётганини алоҳида таъкидлади.

“Ўтган йили чегара ва сув омбори масаласини бир вақтнинг ўзида ҳал қилдик. Келишувга кўра, ҳозирда томонлар ресурсларни 50 га 50 бошқаради. Биз қирғиз томони сувнинг тахминан 10 фоизидан фойдаланамиз. Қолгани эса 100 йилдан бери Ўзбекистонга оқиб ўтмоқда. Яна 100 йил оқади. Нега биз умумий бошқаришга қарор қилдик? Бу биз учун катта ютуқ. Биринчидан, биз сув сатҳининг 900-горизонтдан ошмаслигини назорат қиламиз. Ерларимиз сув остида қолмаслиги керак. Иккинчидан, суғориш даврида тўғонимиз остида жойлашган қишлоқлар учун етарли миқдорда сув олишимиз керак”, — деди у.

Жапаровнинг таъкидлашича, Кампиробод Қирғизистондаги 3 минг 101 хонадонни сув билан таъминлайди. Қолган сув эса Ўзбекистонга тушади.

“Ариқ, қувур, ҳаво — сувнинг Ўзбекистонга қандай боришининг фарқи нимада? Биз ҳар бир ҳаракатни томонларнинг келишувига биноан амалга оширамиз. Келгусида қирғиз-ўзбек дўстлиги мустаҳкам бўлади. Уни Худодан бошқа ҳеч ким бузолмайди. Шундай экан, Аллоҳ таолодан тинчлик сўрашимиз керак. Озодлик каби оммавий ахборот воситаларининг провокацияларига берилмаслигимиз керак”, — дея хулоса қилди у.