Қирғизистон президенти Садир Жапаровнинг жияни Улан Жапаров уй қамоғига олинди. Бу ҳақда 24.кг хабар берди.
Ички ишлар вазирлиги терговчиси Улан Жапаровга нисбатан 26 ноябрга қадар эҳтиёт чорасини ўзгартиришни сўраган. Бунгача президентнинг жияни 21-сонли ахлоқ тузатиш муассасасида сақланаётганди.
Садир Жапаровнинг қариндоши Қирғизистон Жиноят кодексининг “Коррупция” моддаси бўйича айбланмоқда. Мазкур ҳолат юзасидан Ички ишлар вазирлиги ҳузуридаги тергов хизмати томонидан тергов ҳаракатлари олиб борилмоқда. Маълумотни Қирғизистон президенти матбуот хизмати раҳбари Дайирбек Орунбеков ҳам тасдиқлаганди.
“Садир Жапаров аввалроқ таниш-билиш ва қариндош-уруғлигидан қатъи назар, ҳар ким ўз қилмиши учун қонун бўйича жавоб бериши ҳақида огоҳлантирганди”, — деган Орунбеков.
Қирғизистон президентининг қариндоши ҳибсга олинишига изоҳи
Садир Жапаров жияни ҳибсдалигига муносабат билдирар экан, “ҳаммага бирдек муносабатда бўлиш керак”, деб таъкидлаган. Агар бирор киши коррупцияга алоқадор бўлса, у ким бўлишидан қатъи назар, қамоққа олиниши кераклигини айтган.
“Давлатга икки баробар зарарни қоплаганингдан кейингина озод этиласан. Тўламасанг, кетолмайсан. У менинг укам, деб жиноятчининг қўлга олинишига йўл қўймасам, бошқа ака-укалар ҳам аралаша бошлайди. Қирғизларда яхши ибора бор: Бирнинг жазоси мингга сабоқ. Бу менинг изоҳим”, — деган Жапаров.
Изоҳ (0)