“Ғазо шифохоналаридан одамларни эвакуация қилишнинг иложи йўқ” — Фаластин шифокорлари

Фаластинлик шифокорлар Ғазодаги шифохоналардан аҳолини эвакуация қилишнинг иложи йўқлигини маълум қилди. Бу ҳақда BBC хабар берди.

Ғазодаги “Ал-Шифа” касалхонаси жарроҳлик бўлими бош шифокори Марван Абусада вазиятни ҳалокатли деб баҳолади.

“55 мингга яқин ички кўчирилганлар шифохонанинг ҳар квадрат метрини эгалламоқда”, — деди у.

Абусаданинг сўзларига кўра, шифохона ҳаддан ташқари юклама билан ишламоқда, янги ярадорлар келиши билан эски беморлар коридорларга кўчирилади.

“Оғриқ қолдирувчи воситалардан тортиб антибиотикларгача бўлган ҳамма нарсанинг етишмаслиги вазиятни жуда қийинлаштиради. Биз бундан ортиғини қила олмаймиз”, — дея қўшимча қилди шифокор.

Исроил ҳарбийлари “Ал-Шифа” касалхонаси остида ҲАМАС базаси борлигини иддао қилади. ҲАМАС буни рад этади.

Аввалроқ Фаластин Қизил Ярим Ой жамияти Исроил ҳарбийлари Ғазодаги “Ал-Қудс”ни эвакуация қилишга буйруқ берганини маълум қилганди. Ташкилотнинг айтишича, беморлар реанимация бўлимида, чақалоқлар эса инкубаторларда, шунинг учун уларни кўчириш мумкин эмас.

“Ал-Қудс” касалхонаси ва унинг атрофида 14 мингга яқин тинч аҳоли бошпана топгани тахмин қилинмоқда. Якшанба куни касалхона биноси ҳудуди ҳаво ҳужумларига учраган.

Фаластин Соғлиқни сақлаш вазирлиги 30 октябрь куни Ғазо шаҳри жанубида жойлашган турк касалхонаси Исроил ҳаво ҳужумига учраганини маълум қилди.