Жаҳон соғлиқни сақлаш ташкилоти раҳбари Тедрос Адҳаном Гебреесус Twitter’да Ғазо секторидаги шифохоналар нега ҳанузгача эвакуация қилинмаганини тушунтирди.
“Такрор айтамиз — беморлар билан тўла шифохоналарни уларнинг ҳаётини хавф остига қўймасдан эвакуация қилишнинг иложи йўқ. Халқаро гуманитар қонунларга кўра, соғлиқни сақлаш ҳар доим ҳимояланган бўлиши керак”, — деб ёзади ЖССТ раҳбари.
ЖССТ, шунингдек, Ғазода фавқулодда хизматларнинг ишлаши учун зарур бўлган дори-дармонлар ва ёқилғи етишмаслигини таъкидламоқда.
Аввалроқ Фаластин Қизил Ярим Ой жамияти Ғазо секторидаги “Ал Қудс” касалхонасини эвакуация қилиш билан боғлиқ таҳдидлар ҳақида ҳисобот берган. Гебреесус ушбу вазиятдан қаттиқ хавотирда эканини айтган.
Ўтган ҳафта Ғазо Соғлиқни сақлаш вазирлиги ҳудуддаги 12 та касалхона ва 32 та тиббий марказ ишдан чиққанини хабар қилганди.
Изоҳ (0)