7 октябрь куни Исроилга ҳужум уюштиришдан аввал ҲАМАС жангчиларининг кичик гуруҳи сўнгги икки йил давомида Ғазо сектори остидаги туннелларда қурилган стационар телефонлар тармоғи орқали алоқа алмашган. Бу ҳақда CNN телеканали Америка разведкаси маълумотлари билан таниш бўлган икки манбага таяниб хабар берди.
Телеканал суҳбатдошларининг қайд этишича, туннеллардаги телефон линиялари ҲАМАСга Исроил разведкасига сездирмай мулоқот қилиш имконини берган.
Америка разведка хизматларининг маълумотларига кўра, ушбу гуруҳ икки йил давомида ўзини сездирмаган, фақат 7 октябрь куни Исроилга ҳужумдан олдин фаоллашган. Гуруҳ бу вақт давомида компьютер ва мобил телефонлардан фойдаланмаган.
CNN суҳбатдошларидан бирининг айтишича, ҲАМАСнинг қуруқликдаги қўмондонлари ва гуруҳ жангчилари бир неча ой давомида машғулотлар ўтказиб, тайёр ҳолатда бўлишига қарамай, аниқ режалар ҳақида ҳужумдан бир неча кун олдин хабар топишшган. ҲАМАСнинг айрим тайёргарликлари кўзга ташланган, аммо уларга етарлича эътибор берилмаган. Манбага кўра, разведка хизматлари “ҲАМАС ҳар доим одамларни шундай тайёрлайди, бу ғайриоддий кўринмайди” деб ўйлашган.
Исроил расмийсининг телеканалга айтишича, 2023 йилнинг ёзида исроиллик ҳарбийлар Ғарбий Соҳил шимолидаги Женин шаҳрида операция ўтказаётганда кўринишидан алоқа тизимига ўхшаш қурилмани аниқлаган. Улар хавфсиз алоқа линиясини ва Исроил қўшинлари ҳаракати ҳақида олдиндан огоҳлантирувчи видеокузатув камераларини топган. Ўшанда Исроил армияси буни “террорчилар ўртасидаги мувофиқлаштириш ва музокаралар маркази” деб атаган.
Аввалроқ The New York Times газетасининг Исроил разведка хизматларидаги суҳбатдошлари ҳарбийлар ва разведка бир қатор хатоларга йўл қўйгани, шу сабабли улар ҲАМАС ҳужумини қайтара олмаганини айтишганди. Жумладан, разведка ходимлари ҲАМАСнинг асосий алоқа каналларини кузата олмаган, шунингдек, гуруҳ қўмондонларининг ҳеч қандай ҳужумни режалаштирмаётгани ҳақидаги баёнотларига ишонган. Нашр манбаларига кўра, Исроил разведка хизматлари томонидан тингланган суҳбатларда ҲАМАС қўмондонлари қуролли тўқнашувдан қандай қочишни исташи ҳақида гапирган. Энди Исроил разведкаси бу суҳбатлар дезинформациянинг махсус қисми бўлган-бўлмаганини аниқлашга уринмоқда.
Изоҳ (0)