Бирлашган Миллатлар Ташкилотининг Фаластинлик қочқинларга ёрдам кўрсатиш агентлиги (UNRWA) бош комиссари Филипп Лаззарини БМТ Хавфсизлик кенгаши йиғилишида Ғазо секторида содир бўлаётган воқеаларни фаластинликларнинг “оммавий жазоланиши” деб атади. Унинг таъкидлашича, қурбонларнинг 70 фоизи аёллар ва болалардир, буни эса шунчаки урушдаги йўқотиш деб бўлмайди.
“Ғазода хавфсиз жой йўқ. 670 мингдан ортиқ кўчирилган одамлар мактаблар ва UNRWA биноларига келиб жойлашган. Улар даҳшатли антисанитария шароитида яшамоқда, озиқ-овқат етарли эмас, улар матрассиз полда ёки кўчада очиқ осмон остида ухлашяпти. Очлик ва умидсизлик халқаро ҳамжамиятга қарши ғазабга айланмоқда”, — деди Лаззарини.
У Ғазода тинч аҳоли бошпана қилган бинолар аёвсиз зарбага учраётганини қўшимча қилди.
“Маълумотларга кўра, ҳалок бўлганларнинг 70 фоизи болалар ва аёллардир. Save the Children ташкилотининг кечаги ҳисоботига кўра, Ғазода уч ҳафта ичида 3 200 га яқин бола ўлдирилган. Бу 2019 йилдан бери ҳар йили глобал можаро зоналарида ҳалок бўлган болалар сонидан ошиб кетди. Буни уруш зарари дейиш мумкин эмас. Черковлар, масжидлар, касалхоналар, UNRWA бинолари... ҳеч бирини аяшмаяпти. Кўп одамлар хавфсиз жой излаб ҳалок бўлди. Ғазонинг бу тарзда қамал қилиниши оммавий жазолаш ҳисобланади”, — деди UNRWA Бош комиссари.
Аввалроқ Жаҳон соғлиқни сақлаш ташкилоти раҳбари Тедрос Адҳаном Гебреесус Twitter’да Ғазо секторидаги шифохоналар нега ҳанузгача эвакуация қилинмаганини тушунтирганди.
“Такрор айтамиз — беморлар билан тўла шифохоналарни уларнинг ҳаётини хавф остига қўймасдан эвакуация қилишнинг иложи йўқ. Халқаро гуманитар қонунларга кўра, соғлиқни сақлаш ҳар доим ҳимояланган бўлиши керак”, — деб ёзади ЖССТ раҳбари.
ЖССТ, шунингдек, Ғазода фавқулодда хизматларнинг ишлаши учун зарур бўлган дори-дармонлар ва ёқилғи етишмаслигини таъкидламоқда.
Изоҳ (0)