Zo‘r TV каналидаги «Артист» лойиҳаси ёш истеъдод соҳибларини кашф қилишда давом этмоқда. Лойиҳа иштирокчиси Элёрбек Мелибоевнинг «Ялала бобо» деб номланган термаси бугун кўпчиликнинг тилига тушган.
Кўрсатув ҳакамларидан бири бўлган Муниса Ризаева Элёрбек Мелибоевни ўзининг продюсерлик марказига таклиф қилгани ҳам катта шов-шувларга сабаб бўлди.
«Дарё» мухбири Феруз Муҳаммад Элёрбек Мелибоев билан суҳбатда унинг Муниса Ризаеванинг таклифига муносабати, «Артист»дан кейинги ижоди ва шоу-бизнесга қанча пул сарфлаётганига қизиқди.
«Артист» лойиҳасига келишимиз жуда қизиқ бўлган. Пандемия сабабли «Артист» лойиҳасининг бўлиб ўтиши узоққа чўзилиб кетди. Бу лойиҳа ҳақида Озодбек Назарбековнинг Instagram саҳифаси орқали хабар топганман. Шу эълон бўйича лойиҳага ўзимни видеомни жўнатдим. Орадан ярим йилча вақт ўтгач, «Сиз ‘Артист’ лойиҳасига ўтдингиз», деган хабар келди. Кейин элликта иштирокчининг ўртасида кастинг бўлиб ўтди.Бу иштирокчилар ҳаққоний танлаб олингани учун жуда кучли рақиблар йиғилганди. Иштирокчилар деярли барча усулларда, кўплаб тилларда профессионал куйлаш маҳоратига эга ижодкорлар.
Бирор марта мусиқий лойиҳаларга қатнашмаганим учун жуда иккиландим. «Ялала бобо»ни айтганимда, бу кичкина асар деб, бу қўшиқни айтишимга кўпчилик қарши бўлган. Ҳамманинг фикрини олиб, эронча қўшиқ айтадиган бўлдим.
Съёмка куни техник носозлик сабаб гитарани овоз кучайтиргичга улай олмадим, озгина жанжал билан саҳнадан чиқиб кетдим. Лойиҳа продюсери саҳна орқасига ўтиб туришимни, иккита иштирокчидан сўнг яна чиқишимни, айтди.
Саҳна орқасида кузатиб турсам, ҳамма чет тилида қўшиқ айтяпти, «мен ўзбек тилида қўшиқ айтаман», деб саҳнага чиқдим. «Ялала бобо»ни айтдим. Бу қўшиқни мухлислар жуда ҳам яхши кутиб олди. «Ялала бобо»нинг орқасидан тўсатдан фольклор ва озарбайжонча қўшиқларни улаб кетдим. Қарасам Муниса Ризаева ва Озода Нурсаидовалар ҳайрат билан тинглашмоқда. Жуда қувондим. Бу терма саҳнани ўзида куйланган, аввалдан режа қилинган терма бўлмаган.
Элёрбек Мелибоев, хонанда
«Артист»да Элёрбек Мелибоев «Ялала бобо» попурисини куйлаганидан сўнг, хонанда Муниса Ризаева унга продюсерлик марказига қабул қилишини айтган эди. Элёрбек Муниса Ризаеванинг ушбу таклифи ҳақида гапирди.
Муниса Ризаева ўзининг «продюсерлик марказига қабул қиламан», деганди. Менимча борсам йўқ, демасалар керак. Лекин ҳозирги вақтда продюсер билан ишлаш ниятим йўқ. Муниса Ризаева менга продюсерлик таклиф қилгани жуда маъқул келди. Одамлар орасида бу таклиф бизни қайсидир маънода оммалаштирди. У инсон элликта иштирокчининг ичида битта менга шундай таклиф бергани ва биринчи чиқишимдаёқ улар томонидан бу таклиф бўлгани мени жуда ҳам хурсанд қилди, мотивация берди. Аммо ҳали уларнинг таклифига ҳа ёки йўқ жавобини бермадим.Элёрбек Мелибоев, хонанда
Суҳбат давомида Элёрбек Мелибоев шоу-бизнесга қанча пул сарф қилаётганига ҳам тўхталиб ўтди.
«Кундалик харажатларни айтмаганимда шу вақтгача деярли ҳеч қанча пул сарфламадим. Юртдошларимиз яхши кунларига, хизматларга кўп чақирмоқда. Масалан, май ойида 9 кун съёмка ишларимиз бор эди. Фақат шу кунларда хизматга чиқа олмадик, бошқа кунларимиз хизматлар билан банд қилинган», — дейди хонанда.
Маълумот учун, Элёрбек Мелибоев Фарғона шаҳрида, 2001 йил, 30 апрель куни дунёга келган. Бугунги кунда Ўзбекистон давлат санъат ва маданият институтида таҳсил олмоқда.
Изоҳ (0)