Россиянинг “Искандар” ва “Кинжал” ракеталарини ишлаб чиқарувчи “Машинасозлик конструкторлик бюроси” (МКБ) корпорацияси воситачи компаниялар ёрдамида Европа ва бошқа мамлакатлардан бутловчи қисмларни олишда давом этмоқда, деб ёзади Тhе Insider.
Журналистлар, хусусан, “Ростех” таркибига кирувчи ушбу корпорация ракеталар учун Америка чипларини Хитойдан олишини аниқлади. Улар 2021 йилда ташкил этилган Москванинг ETS Electronics МЧЖ компанияси томонидан Хитойнинг EТC Electronics Limited компаниясидан сотиб олинади.
Корпорация ўз ракеталари учун бошқа компонентларни Европадан олади. Масалан, Москвадаги “Остек-Тест” масъулияти чекланган жамияти орқали Польшадан иситиш ва совитиш камералари келтирилади, МКБ учун токарлик станокларини эса “КЕБ-Рус” МЧЖ Германиядан харид қилади. Воситачи фирмалар, шунингдек, Литва, Латвия, Бельгия ва Буюк Британиядаги ишлаб чиқарувчилардан МКБ учун маҳсулотлар сотиб олади.
Тhе Insider МКБга Сергей Питиков раҳбарлик қилаётганига эътибор қаратди. Нашрнинг ёзишича, унинг қизи Майа Питикова Швециянинг Малмо шаҳри яқинида яшайди. Журналистлар билан суҳбатда у “Путин режими жиноий, қонли, маъносиз уруш олиб бораётганини” айтган, аммо бошқа изоҳ беришдан бош тортди.
“Мен, аввало, отамга қарши қаратилган суҳбатда қатнашишга тайёр эмасман”, — деди Питикова.
Сентябрь ойида Тhе Insider нашри Украинада кенг кўламли уруш бошланганидан бери Латвиядан Россияга миллионлаб евро қийматидаги чиплар олиб келингани ҳақида хабар берганди.
Изоҳ (0)