Москванинг Некрасовка туманидаги “Руднево” саноат парки ҳудудида завод қурилиши якунланди, шаҳар ҳокимияти уни “Алмаз-Антей” мудофаа корхонасига топширди. Яқин орада концерн заводда ҳаво ҳужумидан мудофаа ракеталарини ишлаб чиқаришни йўлга қўйиши кутилмоқда.
Москва ҳукумати матбуот хизмати заводнинг очилишида Москва мэри Сергей Собянин, мудофаа вазири Сергей Шойгу ҳамда савдо-саноат вазири Денис Мантуров иштирок этганини таъкидлади. Москва ҳукумати веб-сайтида айтилганидек, завод “рекорд” муддатда — саккиз ярим ой ичида қурилган.
“Алмаз-Антей” бош директори Ян Новиковнинг сўзларига кўра, концерн ракета ишлаб чиқаришни 2024 йилнинг октябригача йўлга қўйиши кутилмоқда.
“Бугун биз эстафетани қабул қиламиз. Олдимизда худди шундай ажойиб вазифа турибди: энг қисқа вақт ичида ускунани ўрнатиш, одамларни ўқитиш ва назорат партиясини чиқариш”, — деди Новиков.
Москва ҳукумати матбуот хизмати концерн томонидан ишлаб чиқарилган маҳсулотларни қайта ишлаш, йиғиш ва синовдан ўтказиш шу завод ҳудудида амалга оширилишини қўшимча қилди.
Ўз навбатида, “Важние истории” нашрининг таъкидлашича, ракета ишлаб чиқаришни йўлга қўйиш режалаштирилган “Руднево” саноат парки аҳоли турар жой биноларига яқин жойлашган (Яндекс хариталарига кўра, энг яқин уй 500 метрдан камроқ масофада).
Завод қурилиши 2020 йилда бошланган, 2022 йил август ойида Собянин саноат паркининг яратилиши иш ўринлари етишмаслиги муаммосини ҳал қилишини айтган.
Изоҳ (0)