Бирлашган Миллатлар Ташкилоти бош котиби Антониу Гутерриш Хавфсизлик кенгашидаги нутқи нотўғри талқин қилинаётганидан “шокда” эканини айтди.
Гутерриш 25 октябрь куни журналистлар билан суҳбатда БМТ Хавфсизлик кенгаши йиғилишидаги нутқида “ҲАМАС томонидан 7 октябрь куни Исроилда содир этилган даҳшатли ва мисли кўрилмаган терактларни сўзсиз қоралаганини” таъкидлади.
Бироқ бош котибнинг нутқидан БМТ матбуот хизмати келтирган иқтибос “нотўғри талқин қилинган”. Гап Гутерреш нутқининг “ҲАМАС ҳужуми бесабаб юзага келмаган” деган қисми ҳақида бормоқда. Унда Гутерриш Фаластин халқи “56 йилдан бери ишғол остида” эканига ишора қилади.
“Дарҳақиқат, мен Фаластин халқининг дардлари ҳақида гапирдим ва аниқ қилиб шундай дедим: “Фаластин халқининг шикоятлари ҲАМАСнинг даҳшатли ҳужумларини оқлай олмайди”. Сўнг Яқин Шарқ инқирозининг барча жиҳатлари бўйича ўз позицияларимни келтириб, тақдимотимни давом эттирдим. Мен буни вазиятга ойдинлик киритиш учун, айниқса, қурбонлар ва уларнинг оилаларини ҳурмат қилиш учун зарур эди, деб ҳисоблайман”, — тушунтирди БМТ раҳбари.
Шу билан бирга, Гутерриш “тинч аҳолини қасддан ўлдириш, яралаш ва ўғирлаш ёки тинч аҳоли нишонларига ракета учирилишини ҳеч нарса оқлай олмайди” деб таъкидлади.
Исроил Гутерришнинг “ҲАМАС ҳужуми бесабаб юзага келмаган” деган сўзларидан кейин БМТ бош котибини истеъфога чақирди. Исроилнинг БМТдаги доимий вакили Гилад Эрдан мамлакат БМТ ходимларига виза беришни тўхтатишини айтди.
Изоҳ (0)