“Халқ бизни кечирмайди”. Қирғизистон парламентида байроқни ўзгартириш устидан низо келиб чиқди

Қирғизистон Жогорку Кенеши (парламенти) депутати Мирлан Самийкожо республика байроғини ўзгартириш ташаббусига қарши чиқди. У қонун чиқарувчи орган йиғилишида ўз позициясини билдирди. Бу ҳақда 24.kg хабар берди.

Депутатнинг сўзларига кўра, ижтимоий тармоқларда Қирғизистон жамоатчилиги республика байроғининг ўзгаришига қарши. 

“Бошқа иш билан шуғулланайлик. Келинглар, байроққа тегмайлик. 30 йилдан бери яшаб келаётган давлат рамзида қуёш нурлари бор. Олов, аланга аломатлари. Агар кунгабоқар деб қаралаётган қуёшни нурларини тўғри қилиб ўзгартирсак, у дулавратотуга (ўсимлик тури) айланади. Бўйингача муҳимроқ ишлар турганида байроқ билан шуғуллансак, халқ бизни кечирмайди”, — деди депутат.

Мирлан Самийкожо давлат рамзи қачон қабул қилингани ва бу нимани англатишини минбардан туриб айтишга тайёрлигини билдирди. Бунга жавобан спикер Нурланбек Шакиев яқинда байроқ муаллифлари билан учрашганини эслади.

“Ҳатто улар ҳам ҳозирда давлат рамзини танимаётганликларини айтмоқда. У ҳозиргидек эмас. Сиз қирғизча элементларни яхши биласиз. Ҳаммаси бошқача кўринишда. Биз уни асл кўринишга қайтармоқчимиз. Ҳеч қандай ўзгаришлар бўлмайди”, — деди Шакиев.

Бироқ депутат Самийкожони мазкур жавоб қаноатлантирмади.

“Ким қуёш нурлари кунгабоқарга ўхшайди деса, ўзи ҳам кунгабоқар. Бошқалар айтганини қиладиганлар ҳам шундай”, — деди у.

Аввалроқ Қирғизистонда байроқдаги қуёш нурларининг шаклини ўзгартириш тўғрисидаги қонун лойиҳаси Жогорку Кенеш муҳокамасига қўйилганди. Ташаббускорлар спикер Нурланбек Шакиев ва депутат Улан Примов бўлган. Улар қуёш нурлари тўлқинсимон бўлганидан кунгабоқар гулига ўхшаб қолганини айтган.