23 октябрда нишонланадиган Халқаро қор қоплони куни муносабати билан атроф-муҳитни муҳофаза қилувчи бир қатор ташкилотлар қор қоплонига миллий ҳайвон мақомини бериш илтимоси билан Қирғизистон президенти Садир Жапаровга мурожаат қилишди.
Мурожаат қор қоплони ва унинг экотизимларини сақлаш бўйича Глобал дастур, Қирғизистондаги Snow leopard foundation жамғармаси, “Илбирс” жамоат фонди ва Германия табиатни муҳофаза қилиш иттифоқининг Қирғизистондаги бўлими томонидан қўллаб-қувватланди, деб ёзади “Кактус.медиа”.
“Мурожаатда қор қоплони ва унинг яшаш муҳитини муҳофаза қилиш муҳимлиги таъкидланган ҳамда ташкилотлар бу борада ҳамкорлик қилишга тайёр экани билдирилган. Миллий ҳайвонлар маданият ва табиат тимсолига, ғурур ва халқаро эътироф манбаларига айланган бошқа мамлакатлар, жумладан Ҳиндистон, АҚШ ва Хитойнинг муваффақиятли мисолларига асосланиб, ушбу ташаббус тобора долзарб бўлиб бормоқда”, — дейди фаоллар.
Қор қоплонининг мамлакат миллий ҳайвони сифатида тан олиниши баланд тоғлар экотизимининг биохилма-хиллигини сақлаш, экотуризмни ривожлантириш ҳамда Қирғизистоннинг атроф-муҳит ва биохилма-хилликни муҳофаза қилиш тарафдори сифатидаги нуфузини мустаҳкамлаш бўйича чора-тадбирларни кучайтиришга ёрдам беради.
Ташкилотлар вакиллари Қирғизистон президентининг мурожаатни кўриб чиқиб, қор қоплони фойдасига қарор қабул қилишига умид билдирмоқда.
Изоҳ (0)