Yevropa Ittifoqiga a’zo bo‘lishni kutayotgan Moldova va Ukraina mamlakatlari Yevroparlamentga kuzatuvchi sifatida qo‘shilishi mumkin, dedi Yevroparlament rahbari Roberta Metsola Politico nashriga bergan intervyusida. Moldova va Ukrainadan kelgan kuzatuvchilar ovoz berish huquqiga ega bo‘lmaydi.
“Agar bir mamlakat Yevropaga siyosiy nuqtayi nazardan qarasa, Yevropa unga o‘z eshiklarini keng ochishi kerak”, — deydi Metsola.
Bu g‘oyani amalga oshirish uchun ittifoq parlamentdagi siyosiy guruhlardan yordam olishi, shuningdek, Yevropa Ittifoqining boshqa nomzodlariga ham xuddi shunday imkoniyatni taqdim etishi kerak bo‘ladi.
“Kengayish har doim Yevropa Ittifoqining eng kuchli geosiyosiy vositasi bo‘lib kelgan”, — deya qo‘shimcha qildi Metsola.
Ukraina va Moldova 2022-yil iyun oyida Yevropa Ittifoqiga kirish uchun nomzod maqomini olgandi. 2023-yil oktyabr oyida Yevropa Kengashi prezidenti Sharl Mishel Ukraina va boshqa nomzod davlatlar “uy vazifalarini” bajarish sharti bilan 2030-yilgacha Yevropa Ittifoqiga a’zo bo‘lishlari mumkinligini aytdi.
Izoh (0)