Татаристон раҳбари Рустам Минниханов Чеченистон раҳбари Рамзан Қодировнинг ўғли Адамни “Дуслик” (“Дўстлик”) ордени билан тақдирлади. Бу ҳақда Чеченистон Давлат думаси депутати Адам Делимханов маълум қилди.
Унга кўра, 15 ёшли Адам Қодиров “миллатлараро ҳамда конфессиялараро тинчлик ва тотувликни мустаҳкамлашга қўшган катта ҳиссаси учун” тақдирланган. Делимхоновнинг айтишича, мукофотни Қодировнинг ўғлига Миннихонов шахсан топширган.
Делимхонов “Грозний Сити” олдида Рамзан Қодиров, Адам Қодиров ва Рустам Миннихонов билан тушган суратини чоп этди. Суратда Адам Қодировнинг кўксида медал кўринади.
Коррупцияга қарши курашиш жамғармаси терговчиси Олег Эмеляновнинг таъкидлашича, 24 октябрь куни Миннихановнинг бизнес-жети Чеченистонга учиб кетган.
Рамзан Қодиров Миннихонов Чеченистонга ташриф буюрганини тасдиқлади.
“Мен Рустам Нургалиевичдан Қодировлар оиласи вакилига “Дуслик” орденини топширгани учун миннатдорман”, — деди у Татаристон раҳбари билан учрашувдан кейин.
“Дуслик” ордени Татаристонда 2015 йилда тасдиқланган. Орден билан Россия ва бошқа мамлакатлар фуқаролари “Татаристон Республикаси давлатчилигини ривожлантириш, фуқароларнинг ҳуқуқ ва эркинликларини таъминлаш, иқтисодиёт, маданият, санъат ва спортни ривожлантиришдаги алоҳида хизматлари учун” тақдирланади
Ушбу орденни олишдан аввал “Татаристон Республикаси олдидаги хизматлари учун” медалини олиш керак. Адам Қодировнинг бундай медал билан тақдирлангани ҳақида хабар берилмаган.
Изоҳ (0)