АҚШ ўзининг Халқаро тараққиёт агентлиги (USAID) орқали қиймати 410 минг долларга тенг бўлган 131 тонна озиқ-овқат ёрдамини Ўзбекистонга етказиб берди, деб хабар бермоқда АҚШнинг Ўзбекистондаги элчихонаси матбуот хизмати.
Қайд этилишича, 23 ноябрь куни келтирилган юк тўйимли сабзавотлар ва дуккаклилар аралашмасидан иборат бўлиб, 98 та соғлиқни сақлаш ва ижтимоий ҳимоя муассасасига тарқатилиб, мамлакатдаги 35 минг нафар энг ёрдамга муҳтож фуқароларга тарқатилади.
Улар қаторига дори-дармонга чидамли сил касаллиги билан оғриган беморлар, узоқ муддатли парваришлаш муассасалари, меҳрибонлик уйлари ва кексалар ва ногирон болаларни парваришлаш ва қўллаб-қувватлаш муассасаларидаги фуқаролар киради.
2010 йилдан буён USAID'нинг озиқ-овқат кўмагини бериш халқаро ҳамкорлик дастури доирасида қиймати 4 миллион доллардан ортиқ 1425 тонна озиқ-овқат ёрдами Ўзбекистонга етказиб берилган. Беғараз ёрдам сифатида берилган бу озиқ-овқат маҳсулотлари Американинг нотижорат ташкилоти Resource Policy Exchange томонидан «Соғлом авлод учун» халқаро хайрия жамғармаси билан ҳамкорликда тарқатилади.
Ўзбекистонга яқинда келтирилган бу гуманитар ёрдам АҚШнинг соғлиқни сақлаш соҳасига киритган 122 миллион АҚШ доллардан зиёд узоқ муддатли сармоясининг давоми бўлиб, сўнгги 20 йил мобайнида берилган умумий ёрдам қиймати 1 миллиард АҚШ долларидан ошган.
Изоҳ (0)