“Барча ҳамкасбларни ушбу муҳим воқеа билан табриклаймиз” — Саида Мирзиёева Ўзбекистон ташаббуси асосида ишлаб чиқилган резолюция маъқуллангани ҳақида

ЮНЕСКО Ижроия кенгаши Ўзбекистон ташаббуси асосида ишлаб чиқилган ахборотдан фойдаланиш соҳасидаги резолюцияни бир овоздан маъқуллаганди. Президент ёрдамчиси Саида Мирзиёева ушбу муҳим воқеа билан табриклади.

Ўзбекистон ташаббуси асосида ишлаб чиқилган “Халқаро ахборотдан эркин фойдаланиш куни муносабати билан Тошкент декларацияси” резолюцияси ЮНЕСКО Ижроия кенгашининг 217-сессиясида бир овоздан маъқулланганди. Резолюцияда 2022 йил сентябрда Тошкент шаҳрида ЮНЕСКО билан ҳамкорликда ўтказилган Халқаро ахборотдан эркин фойдаланиш кунига бағишланган конференция аҳамияти юқори баҳоланган.

“Мазкур резолюциянинг қабул қилиниши — Ўзбекистонда фуқароларнинг сўз эркинлиги ва ахборотдан фойдаланиш ҳуқуқларини таъминлаш бўйича ислоҳотлар жараёнида эришилган ютуқлар халқаро даражада эътироф этилаётганининг навбатдаги ифодасидир.

Ҳужжатни тайёрлашда ҳаммуаллиф сифатида иштирок этган барча ҳамкорларимизга миннатдорлик билдирамиз ва барча ҳамкасбларни ушбу муҳим воқеа билан табриклаймиз”, — деди Саида Мирзиёева.

Резолюция ЮНЕСКО Бош конференциясининг 41-сессиясида (9—24 ноябрь кунлари Париж шаҳрида бўлиб ўтади) кўриб чиқилиши ва тасдиқланиши учун киритилади.