23-oktyabrda nishonlanadigan Xalqaro qor qoploni kuni munosabati bilan atrof-muhitni muhofaza qiluvchi bir qator tashkilotlar qor qoploniga milliy hayvon maqomini berish iltimosi bilan Qirg‘iziston prezidenti Sadir Japarovga murojaat qilishdi.
Murojaat qor qoploni va uning ekotizimlarini saqlash bo‘yicha Global dastur, Qirg‘izistondagi Snow leopard foundation jamg‘armasi, “Ilbirs” jamoat fondi va Germaniya tabiatni muhofaza qilish ittifoqining Qirg‘izistondagi bo‘limi tomonidan qo‘llab-quvvatlandi, deb yozadi “Kaktus.media”.
“Murojaatda qor qoploni va uning yashash muhitini muhofaza qilish muhimligi ta’kidlangan hamda tashkilotlar bu borada hamkorlik qilishga tayyor ekani bildirilgan. Milliy hayvonlar madaniyat va tabiat timsoliga, g‘urur va xalqaro e’tirof manbalariga aylangan boshqa mamlakatlar, jumladan Hindiston, AQSH va Xitoyning muvaffaqiyatli misollariga asoslanib, ushbu tashabbus tobora dolzarb bo‘lib bormoqda”, — deydi faollar.
Qor qoplonining mamlakat milliy hayvoni sifatida tan olinishi baland tog‘lar ekotizimining bioxilma-xilligini saqlash, ekoturizmni rivojlantirish hamda Qirg‘izistonning atrof-muhit va bioxilma-xillikni muhofaza qilish tarafdori sifatidagi nufuzini mustahkamlash bo‘yicha chora-tadbirlarni kuchaytirishga yordam beradi.
Tashkilotlar vakillari Qirg‘iziston prezidentining murojaatni ko‘rib chiqib, qor qoploni foydasiga qaror qabul qilishiga umid bildirmoqda.
Izoh (0)