Франция ҳукумати бомба таҳдиди ҳақидаги хабарлар кескин ортиб бораётгани муносабати билан аэропортлар ва вокзалларда хавфсизлик чораларини кучайтирмоқчи. Париж аэропортларида хавфсизлик учун масъул патруллар сони 40 фоизга, SNCF миллий темирйўл компаниясида эса 20 фоизга кўпайтирилади, деб хабар берди Франция транспорт вазири Клеман Бон France Inter радиоси эфирида.
Бомбалар ҳақидаги ёлғон хабарлар “майда ҳазил эмас, балки оғир жиноятлар” бўлиб, улар текширилади, деди Бон.
“Мамлакатимиз ва Европа транспорт тармоқлари тарихида кўп сонли қурбонлар кузатилган ҳужумлар содир бўлган”, — дея қўшимча қилди вазир-делегат.
Франция икки ҳафтадан бери ҳужумларга “фавқулодда тайёр” ҳолатда
Франция шимолдаги Аррас шаҳрида 20 ёшли чеченистонлик мактабга бостириб кириб, ўқитувчини пичоқлаб ўлдирганидан сўнг, 13 октябрдан бери эҳтимолий ҳужумлар учун “фавқулодда тайёр” ҳолатда. Кейинчалик мамлакатни транспорт тармоғи объектлари, мактаблар ва маданият марказларида бомбалар ҳақидаги ёлғон хабарлар тўлқини қамраб олди.
“Қўрқув билан ўйнашни яхши кўрадиган одамлар бор”, — деб тушунтирди Бон, бомба таҳдидлари тўлқинига ишора қилиб.
Шу тариқа, 22 октябрь куни Париж яқинидаги Версал саройида меҳмонлар сўнгги саккиз кун ичида еттинчи марта “хавфсизлик сабабли” эвакуация қилинди. Версал текширувдан икки соат ўтгач қайта очилди. Аввалроқ Париждаги Лувр ҳам худди шундай сабабларга кўра бомба борлиги ҳақидаги хабарни олгач, 3 минг ташриф буюрувчини эвакуация қилишга мажбур бўлганди.
Клеман Боннинг сўзларига кўра, 11 октябрдан бери Франция аэропортларида 70 та ёлғон бомба ҳақида огоҳлантиришлар бўлган, уларнинг деярли барчаси Швейцариядаги бир электрон почта манзилидан юборилган. Бундай ҳаракат учун Франция қонунчилигида икки йиллик қамоқ жазоси ва 30 минг евро миқдорида жарима назарда тутилган. Агар огоҳлантириш таҳдидни ўз ичига олса, муддат уч йилгача, жарима эса 45 минггача оширилиши мумкин.
Изоҳ (0)