Санкт-Петербург марказида Ўзбекистон фуқаролари бир аёл сабаб муштлашди. Бу ҳақда Россия Ички ишлар вазирлигининг Санкт-Петербург ва Ленинград вилояти бўйича бош бошқармаси матбуот хизмати хабар берди.
Маълумотларга кўра, оммавий муштлашув 17 октябрга ўтар кечаси Достоевский кўчасида содир бўлган. “Каттақўрғон” кафеси яқинида можаро бошлангани ҳақидаги хабар келиб тушганидан сўнг у ерга полиция етиб борган.
Ҳуқуқ-тартибот идоралари ходимлари томонидан ички ишлар бўлимига 23 ёшдан 42 ёшгача бўлган 12 нафар Ўзбекистон фуқароси, жумладан, сартарош бўлиб ишлаётган 34 ёшли аёл олиб кетилган. Аниқланишича, айнан у туфайли кўчада жанжал келиб чиққан бўлиб, оқибатда икки киши ёпиқ бош жароҳати, мия чайқалиши ва кўплаб кўкаришлар билан шифохонага ётқизилган.
Ҳибсга олинганларга нисбатан миграция қонунчилигини бузганлик учун 6 та, майда безорилик учун 8 та баённома тузилган. Бундан ташқари, текширув натижаларига кўра жиноят иши қўзғатилган. Можаронинг тўрт иштирокчиси безориликда гумон қилинмоқда.
Эслатиб ўтамиз, 2019 йилда Москвада Ўзбекистон фуқаролари иштирокида оммавий муштлашув юз берган эди. Шунингдек, Самарқанддаги қурилишда Туркия ва Ўзбекистон фуқаролари ўртасида оммавий муштлашув юзага келган эди. 2021 йилда эса Санкт-Петербургда ўзбекистонликлар иштирокида муштлашув содир бўлганди.
Изоҳ (0)