Сергели туманидаги омбор портлаши оқибатида қанча зарар етказилгани маълум бўлди. Бу ҳақда ҳукумат комиссияси ахборотида эълон қилинган.
Комиссия ахборотига кўра, фавқулодда вазият оқибатида умумий жабрланганлар сони 163 нафарни ташкил этган бўлиб, уларнинг 150 нафари енгил ва 13 нафари оғир тан жароҳати олган. Бир нафар вояга етмаган фуқаро олган оғир тан жароҳатлари натижасида вафот этган.
Жароҳат олганларнинг 24 нафари шифохонага ётқизилиб, уларга тегишли тиббий ва психологик ёрдам кўрсатилган. Қолган 138 нафари амбулатор даволанишга юборилган. Ҳозирда жароҳатланган барча фуқароларнинг саломатлиги тикланиб, уйига рухсат берилган. Аҳолининг муаммоларини тезкор бартараф этиш мақсадида 1205 қисқа рақамли Call-марказ ташкил этилди. Марказга 450 дан ортиқ мурожаат келиб тушган ва барчаси ижобий ҳал қилинган. 400 та эҳтиёжманд оилаларга озиқ-овқат маҳсулотлари етказилди ҳамда уларнинг 100 нафар вояга етмаган фарзандларига моддий ёрдам кўрсатилди.
Фавқулодда вазият оқибатида 39 та кўп қаватли уйдаги 1370 та хонадон ҳамда 246 та ерли хонадоннинг фасад, ойна-ром, эшик ва том қисмига зиён етказилган ва умумий зарар миқдори 14,5 миллиард сўмни ташкил этмоқда.
Фавқулодда вазият натижасида ҳудуддаги 305-сон умумтаълим мактаби (1250 ўринли) ва 600-сон боғчанинг (720 ўринли) дераза-ромлари, эшик ва фасад қисмига зарар етган. Ҳозирда ушбу объектларга пудрат ташкилоти бириктирилиб, қурилиш-таъмирлаш ишлари олиб борилмоқда.
Сергели туманидаги кучли портлаш
Тошкент шаҳри Сергели туманидаги Қурувчилар даҳасида Inter Logistics МЧЖга қарашли омборхонада кучли портлаш ва ёнғин 28 сентябрь куни тунда содир бўлганди. Ҳодиса оқибатида жабрланганларнинг умумий сони 163 кишини ташкил этди, бир нафар ўсмир ҳодиса оқибатида вафот этди.
Содир бўлган фавқулодда ҳодисани ўрганиш, кўрилган талафотларни бартараф этиш ва жабрланганларга ёрдам кўрсатиш бўйича президент топшириғига кўра ҳукумат комиссияси тузилди. Унга кўра, комиссия фавқулодда ҳолат оқибатида зарар етказилган ҳар бир уй-жойни, жумладан, аҳоли хонадонлари, кўп қаватли уй-жойларнинг фасад қисмлари, дераза ва ромлари ҳамда таъмирталаб аҳволга келиб қолган бошқа бино ва иншоотларга етказилган зарарларни бартараф этиш бўйича моддий ёрдам кўрсатиш чораларини кўради.
Изоҳ (0)