Бухоро вилоятида мансабдорлар ичимлик сувидан ноқонуний фойдаланиб, 3,2 миллиард сўмлик зарар етказгани аниқланди. Бу ҳақда “Ўзсувтаъминот” АЖ ахборот хизмати хабар берди.
Маълум қилинишича, “Бухоро қурилиш моллари савдо маркази” МЧЖга қарашли бозор ҳудудида ичимлик сувидан жами 15,2 миллион сўмлик қарздорлиги юзасидан “Бухоро сув таъминот” МЧЖ Бухоро шаҳар филиали ходимлари томонидан 25.04.2023 йилда сув етказиб бериш тўхтатилиб, ҳисоблагичдан олдиндаги сув тутгичи муҳрлаб ёпилган ва далолатнома расмийлаштирилган.
Бироқ “Бухоро қурилиш моллари савдо маркази” МЧЖ мансабдор шахслари томонидан сув тутгич муҳри бузилиб, бозор ҳудудида тижорат мақсадида сувдан ноқонуний фойдаланиб, “Бухоро сув таъминот” МЧЖ Бухоро шаҳар филиалига жами 3,2 миллиард сўмлик зарар етказилгани аниқланди.
Мансабдор шахсларига нисбатан жорий йилнинг 18 апрелида Жиноят кодексининг 169-моддаси 4-қисми “а” банди билан жиноят иши қўзғатилиб, вилоят прокуратураси томонидан мазкур жиноят иши тергови алоҳида назоратга олинди.
Изоҳ (0)