Ўзбекистоннинг қатор ҳудудларида давлат харидларини амалга оширишдаги ноқонуний ҳолатлар аниқланди, деб хабар бермоқда Коррупцияга қарши курашиш агентлиги ахборот хизмати.
Хабарга кўра, агентлик томонидан давлат харидлари соҳасида ўтказиб келинаётган ўрганишлар жараёнида:
- Тошкент вилоятининг Бўстонлиқ тумани имконияти чекланган болалар учун 125-сонли ихтисослаштирилган ёрдамчи мактаб-интернатининг 200,5 миллион сўмлик;
- Фарғона вилояти тарихи ва маданияти Давлат музейининг 245,5 миллион сўмлик;
- Сурхондарё вилоят Эндокринология диспансерининг 313,9 миллион сўмлик давлат харидларида қонун бузилиши ҳолатларига йўл қўйилгани аниқланди.
Мазкур ҳолатлар бўйича (баённома тасдиқланган куннинг ўзида) харид комиссиясининг баённомасини бекор қилиш тўғрисида буюртмачиларга тақдимномалар киритилди ва тўпланган ҳужжатлар қонуний чора кўриш учун Бош прокуратура ҳузуридаги Иқтисодий жиноятларга қарши курашиш департаментига юборилди.
Изоҳ (0)