Қозоғистонлик тадбиркор Қайрат Бўранбоев ўз ихтиёри билан қиймати 1,4 миллиард тенгедан (тахминан 3 миллион доллар) ортиқ бўлган Comfort Hotel Аstana меҳмонхона мажмуасини давлатга топширди. Бу ҳақда Молиявий мониторинг агентлиги матбуот хизмати хабар берди.
Майдони 5 минг квадрат метрдан ортиқ бўлган меҳмонхона Қозоғистон пойтахти марказида жойлашган бўлиб, унинг йиллик айланмаси деярли 900 миллион тенгени (1,9 миллион доллар) ташкил этади.
“Ушбу иншоотдан амалдаги қонунчиликка мувофиқ ижтимоий мақсадларда фойдаланиш, дам олиш, соғломлаштириш ва таълим марказлари ташкил этиш режалаштирилган”, — дейилади матбуот хизмати хабарида.
Активларни қайтариш бўйича ишлар давом эттирилмоқда.
Қайрат Бўранбаев Қозоғистоннинг энг бой ва нуфузли 50 нафар тадбиркори қаторида турарди. Унинг қизи собиқ президент Нурсултон Назарбоевнинг набираси Ойсултонга турмушга чиққан — 2020 йил август ойида Ойсултон вафот этди. Молиявий мониторинг агентлиги матбуот хизмати 2022 йил 17 март куни Бўранбаев ҳибсга олингани ҳақида маълум қилди. Тадбиркор катта миқдорда маблағларни ўзлаштиришда айбланган.
Жорий йилнинг март ойида Остона шаҳрининг 2-Сариаркин тумани суди Бўранбаев ва яна икки кишини 8 йилга озодликдан маҳрум қилди. Уларнинг барчаси газни миллий компанияга қайта сотиш вақтида 14,5 миллиард тенге ўмаришда айбдор деб топилди.
Ёзда жиноят ишлари бўйича судлов ҳайъати газ нархи кўрсатилган ҳужжатнинг асл нусхаси бўлмагани учун Бўранбаев ва бошқа айбланувчиларга нисбатан чиқарилган ҳукмни бекор қилди.
Сентябрь ойида Молиявий мониторинг агентлиги Бўранбаев ихтиёрий равишда 90 миллиард тенгедан (195,4 миллион доллар) ортиқ мол-мулкни давлатга қайтариб бергани ҳақида хабар берди.
Улар орасида нефть кони, газ тақсимлаш корхонаси, хизмат кўрсатиш корхонаси, меҳмонхона ва савдо-кўнгилочар мажмуалари, фитнес марказлари тармоғи, офис бинолари ва бошқалар бор эди. Буни ҳисобга олиб, сентябрь ўрталарида суд Бўранбоевга 6 йилга озодликдан маҳрум қилиш жазосини тайинлади.
Изоҳ (0)