Қозоғистоннинг Тараз шаҳри 2-сонли суди келин ўғирлаганликда айбланган икки эркак — Манғистау ва Ақтўбе вилоятларида туғилган шахсларни етти йилдан озодликдан маҳрум қилди, деб хабар берди Жамбил вилояти прокуратураси матбуот хизмати.
Назорат қилувчи орган маълумотларига кўра, 2022 йил баҳорида фуқаро Ж. ўзаро дўстлар орқали фуқаро А. билан танишган. Бир нечта учрашувлардан сўнг, қиз кейинги мулоқотни рад этган. Бироқ фуқаро Ж. турмуш қуриш учун уни ўғирлашга қарор қилган.
2023 йил февраль ойида дўсти билан Таразга келган эркак қизни алдаб, мажбуран машинага ўтқазиб, шаҳарни тарк этишга уринган. Қизнинг ёрдам сўраб қичқирганини қўшнилар эшитиб, полицияни чақиришган.
Полиция тезда жавоб қайтарган ва гумондорларнинг машинасини қўлга олган.
21 сентябрь куни суд ҳукми билан иккаласи ҳам — бўлажак куёв ва унинг дўсти “одам ўғирлаш” моддаси 2-қисми 1-банди бўйича айбдор деб топилди. Ҳукм ҳали қонуний кучга кирмаган.
Қозоғистон жиноий қонунчилигида ҳалигача келин ўғирлаш бўйича алоҳида модда йўқ. Республикада бундай ишларга алоқадор шахслар, қоида тариқасида, 15 йилгача озодликдан маҳрум этишни назарда тутувчи “одам ўғирлаш” моддаси бўйича судланади (аммо унда ўғирланган аёлни ўз ихтиёри билан озод қилган шахс жавобгарликка тортилмайди, деган банд мавжуд).
Изоҳ (0)