Қизил денгизда АҚШ Ҳарбий-денгиз кучларининг “Карни” эсминеци Ямандан учирилган учта ракета ва бир нечта дронларни тутиб олди. Бу ҳақда CNN Пентагон матбуот котиби Пет Райдер баёнотига таяниб хабар бермоқда.
“Бу бизнинг Яқин Шарқда қурган ҳамда агар керак бўлса, минтақадаги шерикларимиз ва манфаатларимизни ҳимоя қилиш учун фойдаланишга тайёр бўлган ҳаво ҳужуми ва ракетага қарши мудофаа воситаларимизнинг намойиши бўлди”, — деди ҳарбий амалдор.
Унинг сўзларига кўра, америкалик ҳарбийлар орасида қурбонлар йўқ, тинч аҳоли вакиллари ҳам жабрланмаган.
“Биз бу дрон ва ракеталар нимага мўлжалланганини аниқ айтолмаймиз, лекин улар Ямандан учирилган ва Қизил денгиз бўйлаб шимолга, потенциал Исроилдаги нишонларга йўл олган”, — дея Райдернинг сўзларини келтиради CBS News телеканали.
CNN маълумотларига кўра, ракеталар ва дронлар Яман қирғоқлари яқинида эсминет томонидан йўқ қилинган. Телеканал манбаларидан бири ракеталарни Эрон томонидан қўллаб-қувватланган ҳусийлар отганини айтди.
18 октябрь куни “Карне” Сувайш канали орқали Қизил денгизга ўтганди. АҚШ ҳарбий-денгиз кучлари кема “Яқин Шарқда денгиз хавфсизлиги ва барқарорлигини таъминлашга ёрдам беришини” айтган.
Изоҳ (0)