Миср Ғазо секторига гуманитар ёрдам етказиб бериш учун чегарадаги Рафиаҳ пунктини очади. Бу борада Миср президенти Абдулфаттоҳ ас-Сисий ва АҚШ президенти Жо Байден келишиб олди, деб хабар бермоқда CNN.
Байденнинг сўзларига кўра, бошланишига Миср 20 та юк машинасини ўтказишга рози бўлган. БМТнинг Ғазодаги вакиллари уларни кутиб олади ва ёрдам тақсимотида иштирок этади. Агар ҲАМАС таъминотга халақит бермаса, масалан, юкни мусодара қилишга уринмаса, шундагина Мисрдан мунтазам инсонпарварлик ёрдами келишни бошлайди, деди АҚШ президенти.
Байден биринчи юкни етказиб бериш жума кунидан олдин амалга оширилмаслигини қўшимча қилди.
“Улар йўлни ямайди. Юк машиналар ўтиши учун йўлдаги илма-тешикларни тўлдириш керак. Бунинг учун саккиз соат вақт кетиши тахмин қилинмоқда”, — деди Байден.
Эришилган келишув ҳақидаги маълумотни Миср президентининг матбуот котиби Аҳмад Фаҳми ҳам тасдиқлади. У юкни етказиб бериш қачон бошланишига аниқлик киритмади. Аввалроқ Шимолий Синайдаги Қизил ярим ой ташкилоти раҳбари Холид Зайид Рафиаҳ назорат пунктида Миср томонида уч минг тонна гуманитар ёрдам бўлган 200 дан ортиқ юк машинаси кутиб турганини маълум қилганди.
Исроил бош вазири Биньямин Нетаньяхунинг идораси Исроил Мисрдан озиқ-овқат, сув ёки дори-дармон етказиб беришга аралашмаслигини айтган, бироқ инсонпарварлик ёрдами Ғазо секторининг жанубига олиб борилиши ва ҲАМАС қўлига тушмаслиги шарти билан, деб ёзади The Times оf Israel.
Изоҳ (0)