Ўзбекистонда 65 нафар боланинг ўлимига сабабчи дея қаралаётган “Док-1 Макс” сиропи ва унинг машмашалари билан боғлиқ жиноят иши кўриб чиқилаётган судда яна бир порахўрлик ҳақида сўз борди. Суднинг 20 октябрь куни давом этган навбатдаги мажлисида сўроқ қилинган гувоҳлардан бири ўзбекистонлик яна бир мансабдор Ҳиндистонда ишлаб чиқарилган 3 та дорини тан олиш йўли билан рўйхатдан ўтказиш учун давлат тўловидан ташқари 45 минг доллар талаб қилганини маълум қилди. Бу ҳақда судда иштирок этаётган “Дарё” журналисти хабар берди.
Гувоҳга кўра, у пулни “Дори воситалари, тиббий буюмлар ва тиббий техника экспертизаси ва стандартлаштириш давлат маркази” ДУК рўйхатдан ўтказиш бўлими бошлиғи Ш.Ш.га иккига бўлиб — бир марта 20 минг, яна бир марта 25 минг доллар берган. Ва эвазига дорилар учун гувоҳномалар олган. Аммо гувоҳномалардаги камчиликлар сабаб Ўзбекистонга дорилар киритилишига эришмаган.
Ушбу пулларни олгани айтилган “Дори воситалари, тиббий буюмлар ва тиббий техника экспертизаси ва стандартлаштириш давлат маркази” ДУК рўйхатдан ўтказиш бўлими бошлиғи Ш.Ш. гувоҳ ёлғон гапираётганини, унга туҳмат қилаётганини айтди ва пулларни олганини рад қилди.
“Док-1 Макс” судининг аввалги мажлисларида айнан шу сироп ишлаб чиқарувчиси “Кураракс” дори воситасини Ўзбекистонга олиб кириш учун 33 минг доллар пора бергани билдирилганди. Судда сўроқ қилинган Quramax Medical МЧЖ директори С.Р.П. адвокатларнинг саволига жавоб берар экан, Marion Biotech PVT. Ltd корхонасида инспексион текширув ўтказилишини тўхтатиш учун Ж.Э. исмли масъулга 33 минг доллар берганини тан олганди.
Кейинчалик у бу кўрсатмасини ўзгартирди. Мазкур пулнинг олди-бердисида иштирок этган Ж.Э. эса ҳақиқатдан ҳам 33 минг доллар миқдоридаги пул ишлаб чиқарувчининг вакили томонидан унга берилгани ва у бу пулларни бошлиғи “Дори воситалари, тиббий буюмлар ва тиббий техника экспертизаси ва стандартлаштириш давлат маркази” ДУК рўйхатдан ўтказиш бўлими бошлиғи Ш.Ш.га етказганини айтганди. Судда 15 сентябрь куни сўроқ қилинган “Дори воситалари, тиббий буюмлар ва тиббий техника экспертизаси ва стандартлаштириш давлат маркази” ДУК рўйхатдан ўтказиш бўлими бошлиғи Ш.Ш. унга берилгани айтилган 33 минг доллар пулни рад этганди.
Аввалроқ “Дори воситалари, тиббий буюмлар ва тиббий техника экспертизаси ва стандартлаштириш давлат маркази” ДУК раҳбари ўринбосари Н.М. ҳиндистонлик яна бир ишлаб чиқарувчининг 11 та дори воситасини қайта рўйхатдан ўтказиш учун 88 минг доллар талаб қилиб, олдиндан 50 минг доллар олгани маълум қилинганди.
Изоҳ (0)