Эртага бизни қандай кун қаршилашини ҳеч қачон билолмаймиз. Бир зумда инсон ҳаёти ўзгариши, кутилмаган воқеалар содир бўлиши мумкин. Уч фарзанди билан қолган она икки ўғлини олиб Россияга ишлашга кетади. У ерда ошпазлик қилиб ўғилларини ўқитади. Кенжа ўғил Қаҳрамон Жумабоев муҳандислик соҳасини танлайди ва Красноярскда таҳсил олади. Аммо она негадир болаларининг Россияда қолиб кетишини истамайди. Уларни олиб Ўзбекистонга қайтади. Жумабоев Қаҳрамон Тошкентда ўқишини давом эттириб, олий маълумотли муҳандисга айланади. Аммо бир кунда содир бўлган воқеалар унинг ҳаётини буткул ўзгартириб юборади.
“Уйғонсам кўзларим кўрмай қолди”
— Эрталаб уйғонсам, бошим қаттиқ оғриди. Онамга “Бугун ҳеч қаерга бормайман, негадир бошим оғрияпти”, дедим. Ётиб бир неча соат ухладим. Кейин уйғониб, кўзимни очсам, худди қора парда тўсилгандек, ҳеч нарса кўринмади. Қўрқиб кетиб, онамга кўзларим кўрмаётганини айтдим. Тез ёрдам ходимлари биринчи ёрдамни бериб, шошилинч касалхонага олиб кетишди. Қон босимим 200 дан баланд бўлгани учун кўз қон-томирлари қисилиб қолган экан. Бу эса икки кўзимнинг ҳам кўрмай қолишига сабаб бўлибди. Қон босимим тушгунига қадар жонлантириш бўлимида даволаб, кейин Ангрен шаҳрида нефролог йўқлиги учун Тошкентга боришимиз кераклигини айтишди, — дейди Қаҳрамон Жумабоев.
“Мен буйрагимни бераман”
Шифокорлар оғир аҳволдаги Қаҳрамон Жумабоевни текширувдан ўтказиб, унда буйрак етишмовчилиги касаллиги борлигини аниқлашди. Олти ойлик қатъий даволаш чораларини ишлаб чиқишди. Даволаниш жараёнида беморга парҳезга жиддий риоя қилишини қайта-қайта таъкидлашди.
— Онам қўнғироқ қилиб, “Агар укангнинг аҳволи яхшиланмаса, буйрак кўчириб ўтказиш керак экан”, деди. Ўйлаб ўтирмай “Мен буйрагимни бераман”, дедим. Операциядан кейин аҳволим нима кечади, ҳали болаларим ёш, ишлай олармиканман, деган фикрлар хаёлимга ҳам келгани йўқ. Нафақат мен, балки икки фарзанднинг онаси бўлган синглим ҳам буйрагини беришга тайёр эди. Донор бўладиган инсон ҳам операциядан аввал жиддий текширувлардан ўтиши керак экан. Икки ой давомида ДНК таҳлилларини топшириб, операция бўлишимизга жуда оз вақт қолганди. Бу орада укамнинг ҳам кайфияти анча яхши бўлиб қолди. Аммо бир куни тонгда эшигимиз тақиллади. Эрталабдан ким келди экан, деб ҳайрон бўлиб эшикни очсам, укам келган экан. У шошиб нималардир деди. “Онам” деган гапи қулоғимга кирди-ю, қолганини англай олмадим, — дейди беморнинг акаси Одилжон Умбетов.
“Она деб туртдим, аммо аллақачон унинг жони узилиб бўлган экан”
Қаҳрамонларимизнинг онаси Наргиза Назарова ҳаётлик чоғида кўплаб қийинчиликларни бошдан кечирди. 30 ёшида уч бола билан бева қолган аёл пул топиш илинжида мусофирликни ҳам бошдан кечирди. Хаста ўғлининг кўнглини чўктирмаслик учун “Сен соғаясан” дерди-ю, аммо қалбан эзиларди.
— Россияда таҳсил олганим учун рус тилини яхши билардим. Шу боис уйимиз яқинидаги ўқув марказда рус тилидан дарс берардим. Эрталаб чойларни тайёрлаб, “Она, мен кетяпман”, дедим. Аммо у индамади. Чарчаб ухлаб қолган, шекилли, деб ёнига бориб, уйғотишга ҳаракат қилдим. Яна жавоб олмагач, елкасига аста туртиб уйғотмоқчи бўлдим. Аммо онамнинг танаси музлаб бўлганди. Унинг аллақачон жони узилиб бўлган эди. Опамга қўнғироқ қилдим, орқа “дом”да турадиган акамни чақириб келдим. Шифокорлар онамнинг жонсиз танасини текширувдан ўтказиб, юрак тонгги 5:00 да уришдан тўхтаганини айтишди. Жума куни онамга жаноза намози ўқилди, — дейди Қаҳрамон Жумабоев.
“Онам муаммоларни билдирмасликка уринар экан”
Қаҳрамон Жумабоев кенжа фарзанд бўлгани учун ҳамиша онаси билан бирга эди. Кутилмаган ўлим унинг аҳволининг янада оғирлашишига сабаб бўлди. Аммо онанинг ўлимидан кейин талайгина муаммолар кўзга ташланди.
— Онам раҳматли ҳамма муаммони ўзи ҳал қилиб, бизга билдирмасликка уринар экан. Яъни донорнинг операция пули давлат томонидан қопланмайди, дори-дармонларга ҳам яхшигина пул керак экан. Аммо бизда унча пул йўқ эди. Шунда Ангрен шаҳар ҳокими Алишер Райимовга мурожаат қилдим. У кишининг ёрдами билан ҳокимият ҳузуридаги “Саховат ва кўмак” фондидан пул ажратилди. Операция кунига қадар бизни қўллаб-қувватлаган Ангрен тиббиёт бирлашмаси бош шифокори Фурқат акага ҳам минг раҳмат. “Дарё” интернет нашрининг “Меҳридарё” лойиҳасида йиғилган маблағлар ва таниш-билишларнинг ёрдами билан операция муваффақиятли ўтди. Бу ниҳоятда мураккаб операция эканлиги учун баъзи инсонлар уни хорижда ўтказишга интилишади. Аммо ўзбекистонлик шифокорлар ҳам ўз ишининг устаси эканлигига гувоҳ бўлдик. Операциядан кейин икки ой ўтиб ишга қайтдим, укамнинг ҳам аҳволи жуда яхши, — дейди донор Одилжон Умбетов.
“Қон босимим 200 га кўтариларди”
Қаҳрамон Жумабоев бугунги аҳволи ва келажакдаги режалари ҳақида қуйидагиларни сўзлаб берди.
— Бир зумда ҳаммаси ўзгариб кетиши ҳеч гап эмас экан. Россияда муҳандислик соҳаси бўйича ўқидим, ундан сўнг ўқишни Тошкентда давом эттирдим. Дипломни олиб, энди ишга жойлашаман, деганимда соғлиғимда жиддий муаммо борлиги аниқланди.
Ҳозир аҳволим анча яхши, аввалгидек қон босимим 200 даражага чиқаётгани йўқ. Операциядан аввал ҳаракатланолмай қолгандим. Ҳозир бир оз чарчоқни ҳисобга олмаса, эркин ҳаракатлана оламан. Фақатгина парҳез таомларни ейишим ва бир йилга қадар доимий шифокор назоратида бўлишим керак. Илгари акам таомга қалампир қўшиб ейишни ёқтирарди. Ҳозир бундан тийилишга мажбур бўляпти, холос, — дейди Қаҳрамон Жумабоев.
“Қароримдан ҳеч қачон афсусланмайман”
Укасининг саломатлиги тикланиши учун жарроҳлик столига ётишга ҳам ҳайиқмаган Одилжон Умбетовнинг қуйидаги гаплари инсонни мулоҳазага чорлайди.
— Кетса биргина буйрагим кетибди, жигарим ёнимда қолди-ку, шунисидан хурсандман. Онам раҳматли қийинчилик билан катта қилган. Чунки отамиз бизни ташлаб кетганида анча кичик ёшда эдик. “Сизлар меҳрли бўлсаларинг, ҳар қандай муаммони енголасизлар”, деб кўп айтарди. Бу гапларнинг мағзини энди чақяпман. Қароримдан ҳеч қачон афсусланмайман, аксинча укамнинг соғ-саломатлиги менга куч бағишлайди, — дейди Одилжон Умбетов.
Бу оила билан танишар эканмиз, хаёлдан мол-мулк талашиб, бир-бирига тан-жароҳат етказаётган ака-укалар ҳақидаги хабарлар кўз олдимиздан ўтади. Меҳрли инсонлар бор бўлсин, орамизда жигаржонлар кўпайсин.
Видеони қуйида тўлиқ томоша қилишингиз мумкин:
Наргиза Муродова суҳбатлашди.
Изоҳ (0)