Яқин Шарқда ҲАМАС ва Исроил ўртасида можаро бошланган 7 октябрдан бери Ғазо секторида қурбон бўлганлар сони 4 мингдан ошди. Бу ҳақда Al-Jazeera телеканали Фаластин Соғлиқни сақлаш вазирлигига таяниб хабар берди.
Вазирлик маълумотларига кўра, 4137 нафарга яқин фаластинлик ҳалок бўлган, 13 мингдан ортиқ киши жароҳатланган. Яна мингга яқин одам (аксарияти болалар) ҳамон бедарак йўқолганлар рўйхатида қолмоқда. Ғазодаги юнон православ черковига уюштирилган ҳужумда камида 16 киши ҳалок бўлгани, яна ўнлаб кишилар вайроналар остида қолгани айтилмоқда.
Шунингдек, Соғлиқни сақлаш вазирлиги маълумотларига кўра, ўққа тутилиши натижасида ҳудуддаги камида еттита тиббиёт муассасаси ишини тўхтатган ва маҳаллий аҳолига ёрдам бера олмаган.
7 октябрь куни ҲАМАС Исроил ҳудудига ракета зарбалари берганидан кейин Яқин Шарқдаги вазият кескин ёмонлашди. ҲАМАС ҳужумни Исроилнинг Қуддусдаги Ал-Ақсо масжидига қарши ҳаракатларига жавоб деб атамоқда.
Исроил Ғазони тўлиқ блокадага олганини эълон қилиб, Ливан ва Суриянинг бир қатор ҳудудларига ҳам зарба бера бошлади. Тўқнашувлар Ғарбий Соҳилда ҳам содир бўлмоқда. Исроил томонида 1,5 минггача одам можаро қурбони бўлди, 4,5 мингдан ортиқ киши жароҳат олди.
Изоҳ (0)