Yaqin Sharqda HAMAS va Isroil o‘rtasida mojaro boshlangan 7-oktyabrdan beri G‘azo sektorida qurbon bo‘lganlar soni 4 mingdan oshdi. Bu haqda Al-Jazeera telekanali Falastin Sog‘liqni saqlash vazirligiga tayanib xabar berdi.
Vazirlik maʼlumotlariga ko‘ra, 4137 nafarga yaqin falastinlik halok bo‘lgan, 13 mingdan ortiq kishi jarohatlangan. Yana mingga yaqin odam (aksariyati bolalar) hamon bedarak yo‘qolganlar ro‘yxatida qolmoqda. G‘azodagi yunon pravoslav cherkoviga uyushtirilgan hujumda kamida 16 kishi halok bo‘lgani, yana o‘nlab kishilar vayronalar ostida qolgani aytilmoqda.
Shuningdek, Sog‘liqni saqlash vazirligi ma’lumotlariga ko‘ra, o‘qqa tutilishi natijasida hududdagi kamida yettita tibbiyot muassasasi ishini to‘xtatgan va mahalliy aholiga yordam bera olmagan.
7-oktyabr kuni HAMAS Isroil hududiga raketa zarbalari berganidan keyin Yaqin Sharqdagi vaziyat keskin yomonlashdi. HAMAS hujumni Isroilning Quddusdagi Al-Aqso masjidiga qarshi harakatlariga javob deb atamoqda.
Isroil G‘azoni to‘liq blokadaga olganini e’lon qilib, Livan va Suriyaning bir qator hududlariga ham zarba bera boshladi. To‘qnashuvlar G'arbiy Sohilda ham sodir bo‘lmoqda. Isroil tomonida 1,5 minggacha odam mojaro qurboni bo‘ldi, 4,5 mingdan ortiq kishi jarohat oldi.
Izoh (0)