Нигернинг ҳокимиятдан ағдарилган президенти Муҳаммад Базум ҳибсдан “қочишга” уринди, деб хабар бермоқда AFP мамлакатда ҳокимиятни қўлга олган исёнчилар вакили, майор полковник Амаду Абдраманга таяниб.
Режим вакилининг айтишича, президент 19 октябрь оқшомида қочишга уринган, бироқ ҳарбийлар томонидан тўхтатилган. У оиласи, икки ошпаз ва икки хавфсизлик ходими билан биргаликда “қамоқхонадан қочишга уринди” дейди Абдраман.
“Асосий айбдорлар ва Базумнинг баъзи шериклари қўлга олинди”, — деб қўшимча қилди хунта вакили.
Абдраманнинг сўзларига кўра, режада дастлаб Базумни Ниамей чеккасидаги яширин жойга олиб бориш, кейин эса уни олиб кетишга “хорижий кучга тегишли вертолётлар”ни жўнатиш бор бўлган.
Июль ойининг охирида исёнчилар томонидан тузилган “Ватанни қутқариш миллий кенгаши” Базумни ҳокимиятдан олиб ташлади. У ҳибсга олинди. Исёнчилар Базумни давлатга хиёнатда ва мамлакат хавфсизлигига путур етказишда айблади.
Хунта, агар бошқа давлатлар Нигерга бостириб киришга ҳаракат қилса, президентни ўлдириш билан таҳдид қилди. Нигернинг АҚШдаги элчиси айтишича, Базумга озиқ-овқат, электр токи ва овқат пишириш учун газ берилмаган, у ўз уйининг қоронғу ертўласида сақланмоқда.
“Хунта раҳбарининг режаси уни очликдан ўлдириш”, — деди дипломат.
Associated Press хабарига кўра, исёнчилар 12 август куни биринчи марта шифокорга президент ҳузурига киришга рухсат берган.
Изоҳ (0)