Польшада ўз миссиясини якунлаётган Ўзбекистон элчиси Баҳром Бобоев мамлакатнинг Eurogospodarka нашрига интервью берди.
Баҳром Бобоев 2019 йилдан буён Ўзбекистоннинг Польшадаги фавқулодда ва мухтор элчиси лавозимида ишлаб келаётган эди.
Дипломат суҳбат давомида Ўзбекистон ва Польша ўртасидаги ўзаро ҳамкорликнинг асосий йўналишлари қаторига савдо, инвестиция ва молиявий ҳамкорлик, юқори технологиялар трансфери, фан, технология, қишлоқ хўжалиги, таълим, экология, соғлиқни сақлаш ва маданият соҳаларида ўзаро ҳамкорлик, шунингдек, минтақавий хавфсизликни мустаҳкамлаш борасидаги ҳамкорликлар киришини қайд этган.
“Польша Ўзбекистоннинг етакчи савдо-иқтисодий ҳамкорларидан биридир. Логистика имкониятлари чеклангани билан боғлиқ муайян қийинчиликларга қарамай, 2022 йилда ўзаро товар айирбошлаш ҳажми биринчи марта 352 миллион долларга етди, жумладан, Ўзбекистондан Польшага экспорт ҳажмининг ўсиши ҳисобига бу кўрсаткич 131,1 миллион долларни ташкил этди. Польша икки йилдан буён Ўзбекистондан маҳсулот импорт қилиш бўйича Европа Иттифоқи давлатлари орасида етакчилик қилмоқда”, — дейди Бобоев.
Бугунги кунда Ўзбекистон бозорида Польшанинг Adamed Group (соғлиқни сақлаш), Codepharm (фармацевтика), Dreccta Luigong (оғир қурилиш техникаларини ишлаб чиқарувчи), Ленартт (транспорт/логистика), LUG Light Factory (энергетика), Аllians Cаpital (қурилиш кимёси) компаниялари фаолият юритмоқда. Яқин келажакда Transforwarding International (транспорт/логистика), Pronar (қишлоқ хўжалиги машинасозлиги), Сеnеkа Poland (балиқчилик), KGHM (мис ишлаб чиқариш ва қайта ишлаш) компаниялари ўз капиталини мамлакатга киритиш ниятида.
Қайд этилишича, 2023 йилнинг тўққиз ойи давомида 9 мингдан ортиқ Польша фуқароси Ўзбекистонга ташриф буюрган. Uzbekistan Airways ва LOT Polish Airlines авиакомпаниайлари 2023 йил 23 февралдан Варшава—Тошкент—Варшава йўналиши бўйича тўғридан тўғри авиақатновларни йўлга қўяди.
Изоҳ (0)