Ўзбекистоннинг Британиядаги элчиси Саид Рустамов 12 октябрь куни Британия ташқи ишлар вазири ўринбосари лорд Тариқ Аҳмад билан учрашди, деб хабар беради “Дунё” агентлиги”.
Ташқи ишлар вазирлиги раҳбари ўринбосари Буюк Британиядаги дипломатик миссиясини якунлаётган Саид Рустамовга икки давлат ва халқлар ўртасидаги очиқ, конструктив ва дўстона муносабатларни ривожлантиришга қўшган ҳиссаси учун миннатдорлик билдирган.
Шунингдек, элчи ва Британия Ташқи ишлар вазирлиги вакили Ўзбекистон—Британия ҳамкорлигининг бугунги кун тартиби ва уни кенгайтириш истиқболларини ҳам муҳокама қилган.
Саид Рустамов 2019 йил октябрь ойида Буюк Британиядаги элчи лавозимига киришган эди. Бунгача у Исроилдаги элчихонага, Ташқи ишлар вазирлигининг қатор бўлимларига раҳбарлик қилган, АҚШдаги элчи ўринбосари ва ташқи ишлар вазири ёрдамчиси бўлган. Ундан олдин эса Алишер Шайхов Ўзбекистоннинг Буюк Британиядаги элчиси сифатида ишлаганди.
Эслатиб ўтамиз, июль ойида Буюк Британиянинг Ўзбекистондаги янги элчиси этиб Тимоти Смарт тайинланганди. Тайинловга қадар Тимоти Смарт Буюк Британия Ташқи ишлар вазирлигининг Шарқий Ўрта Ер денгизи департаментини бошқарган.
Изоҳ (0)