Ташқи меҳнат миграцияси агентлиги Жанубий Кореяда нелегал бўлиб турган ўзбекистонликларга жарима ва ушбу мамлакатга қайта кириш тақиқларидан озод бўлиш имконияти ҳақида маълумот берди.
Қайд этилишича, Жанубий Корея Адлия вазирлиги қарори билан ушбу давлатда ноқонуний ҳолатда бўлиб турган хорижликлар учун ихтиёрий равишда чиқиб кетишнинг махсус қоидаси кучга кирди. Унга кўра, 2023 йил 9 декабргача ушбу давлатдан ихтиёрий равишда чиқиб кетган ноқонуний хорижликлар жарима ва қайта кириш тақиқларидан озод қилинади.
“Агар сиз мазкур давлатда ноқонуний ҳолатда истиқомат қилаётган бўлсангиз, ушбу имкониятдан фойдаланиб, Корея Республикасига расмий равишда турли визалар орқали кириб келиш имкониятига эга бўлишингиз мумкин”, — дейилади агентлик хабарида.
Ушбу чора-тадбирлар ноқонуний иммиграцияга қарши курашиш, чет эллик ишчиларни жалб этишнинг тегишли ва қонуний тизимларини таъминлаш, ноқонуний меҳнат миграциясига қарши чоралар кўриш, малакали ишчилар сонини кўпайтириш ва чет эллик ишчиларни мавсумий ишларга муаммосиз жалб этишга қаратилган.
Фуқаро иммиграция хизматига боради, “ихтиёрий ариза шакли” ҳужжатини тўлдириб, масъул ходимга топширади. Масъул ходим фуқарога тасдиқнома беради. Ушбу ҳужжат Кореядан чиқиб кетиш чоғида аэропорт масъул ходимига кўрсатилади ва ноқонуний мигрантлар учун ташкил этилган “яшил йўлак” орқали ўз юртига кетади.
Изоҳ (0)