Ҳинд киносининг тирик афсонаси — Ҳема Малини 16 октябрь куни 75 ёшни қарши олди. Шу муносабат билан актрисанинг ҳаёт ва ижод йўлига назар ташлаймиз.
Ҳема Малини Вижаянтимала ва Воҳида Реҳмандан кейин Болливуднинг асосий кино юлдузига айланган учинчи жанубий ҳинд актрисаси эди.
Фаолиятининг энг юқори чўққисида у шунчалик машҳурликка эришдики, Дев Ананд ва Ражеш Ханна сингари етакчи актёрлар муваффақиятга эришиш учун унга мурожаат қилишлари керак эди. Дев Ананднинг 70 йиллардаги фильмлари, айниқса, Зийнат Аман билан бўлган фильмлар кассада муваффақиятсизликка учраганда Ҳема Малини билан ҳамкорликдаги “Камбағаллар ҳимоячиси” фильми оммалашди. Ражеш Ханнанинг фильмлари муваффақиятсизликка учраганда, унинг “Севги шаҳри” фильми вақтинча бўлса ҳам ҳаётга янги руҳ бағишлади.
Ажабланарлиси шундаки, Болливудни забт этган актриса ўз карьерасини жанубда бошлаган. Энг қизиғи, жанубда унинг фаолияти деярли бошланмасдан аввал якун топган.
Ҳема 1948 йил 16 октябрда туғилган. Унинг биринчи режиссёри Шридхар уни 1964 йилда суратга олинган тамил фильмидан ҳайдаб юборган, чунки унинг юлдуз бўлишига кўзи етмаган. Бундан ранжиган Ҳема энг муҳим жойда, яъни Болливуд дунёсида муваффақият қозонишга қарор қилди. У нафақат бунга эришди, балки ўша режиссёр Шридхар унга “Катта фирибгарлик” фильмида суратга тушиш таклифи билан келди.
Ҳема Болливуддаги карьерасини 1968 йилда “Орзулар сотувчиси” фильмида Раж Капур қаршисидаги буюк Вижаянтималанинг ўрнини босишдан бошлади. “Ворис” ва “Менинг исмим Жонни” фильмлари билан Ҳема ҳинд киносининг асосий юлдузига айланди. “Зита ва Гита” уни умуман Болливуднинг юзига айлантирди. Бу рол учун Ҳема Фильмфаре мукофотига сазовор бўлди.
Бир қанча муваффақиятли фильмлар, айниқса, Дҳармендра билан ҳамкорлик, Ҳема Малинини шон-шуҳратини янада орттирди. Биринчи марта “Чиройли ва ўжар” ва “Шон-шараф” каби лойиҳаларда бирга ўйнаган жуфтлик томошабинлар орасида катта шуҳрат қозонди. Ҳема ва Дҳармендранинг ҳақиқий ҳаётдаги муҳаббати уларнинг экрандаги самимийлигини янада оширди.
Ҳема Малини тўғри йўналтирилганида маҳорат билан жонли ўйнай олишини исботлади. Шунингдек, у ўз фильмографиясида турли хил образларни ижро этди. Айниқса, роллари орасида бева аёл образи актрисаларнинг кўпчилиги томонидан рад этилган, чунки улар ўз имижини хавф остига қўйиб, бева аёл ва ёш онанинг ролини ўйнашни хоҳламаган.
Ҳема бундай ролларни ўз зиммасига олди ва унинг уддасидан чиқди. Шунингдек, режиссёр Гулзар билан ишлаш орқали ўзининг жозибали қиёфасини ўзгартиришга уриниб кўрди ва унинг “Унутилган хотин”, “Икки қирғоқ” ва “Дунё” фильмларида энг яхши ролларини ўйнади. Бундан ташқари, “Қасос ва қонун” фильмида ўзини намоён қилди, унда Басантини ўйнади.
Ҳема Малини 1970 йиллар давомида Болливуд кино оламининг юлдузига айланди, ўз даврининг барча етакчи актёрлари билан бирга ишлади. Унинг биринчилиги 80 йилларнинг бошларида, яна бир жанубий актриса Рекҳа майдонга кирганда тугади.
Аммо Ҳема фильмларда иштирок этишни давом эттирди ва энди кучли қаҳрамонлар ролини ўйнай бошлади. Кейинги фильмлари “Кўзи ожиз қонун”, “Бева аёл тақдири” ва “Озодлик” бўлди. Лекин, албатта, оила Ҳема учун муҳимроқ эди. У иккита қизини дунёга келтирди ва кўп вақтини уларнинг тарбиясига бағишлади.
Орадан вақт ўтиб, Ҳема Рави Чопранинг “Боғбон” фильмида экранларга Амитабҳ Баччан билан қайтди. Кейин “Вир ва Зара” ва “Ганга” кабиларни айтиш мумкин.
Шахсий ҳаётда Ҳеманинг кўплаб мухлислари бор эди. Улар орасида Житендра ва Санжив Кумар актрисага турмуш қуриш таклифини билдирган. Аммо Ҳема уйланган ва тўртта фарзанди борлигига қарамай, юрагини Дҳармендрага берди. У гап-сўзларга қарамай, 1979 йилда унинг иккинчи хотини бўлиб, икки қизи Эша ва Аханани дунёга келтирди. Бироқ актрисанинг ахлоқий имижи шу қадар кучли эдики, у деярли матбуот ва жамиятнинг дашномларига дучор бўлмади.
Ҳема Малини 1999 йилда ҳинд кино санъатига қўшган ҳиссаси учун Падма Шри мукофотига сазовор бўлган ва ҳозирда мамлакатнинг ҳукмрон партияси BJP парламент аъзоси.
Изоҳ (0)