Тошкентнинг Олмазор тумани Келес йўли кўчасини кенгайтириш ва реконструкция қилиш, атрофида ободонлаштириш ишларини амалга ошириш мақсадида ҳудудда жойлашган аҳоли ва тадбиркорларга тегишли кўчмас мулк объектлари жамоат эҳтиёжлари учун олиб қўйилади. Бу бўйича Халқ депутатлари Тошкент шаҳар кенгашининг тегишли қарори қабул қилинди.
Қайд этилишича, мазкур кўчмас мулк объектлари мулкдорлари билан очиқ муҳокама ўтказилган ҳамда жами 15 та кўчмас мулк эгаларига ўрнатилган тартибда компенсация берилганидан кейин олиб қўйилишига рухсат берилиши белгиланган.
2023 йил охиригача Келес йўли кўчасини кенгайтириш ва реконструкция қилиш, атрофни ободонлаштириш ишлари якунланади. Шунингдек, жамоат эҳтиёжлари учун олиб қўйилиши режалаштирилган ер участкаларида жойлашган кўчмас мулк объектлари мулкдорлари билан нотариал тартибда келишув битими имзоланади.
Келес йўли кўчасини реконструкция қилиш ва кенгайтириш ишлари январь ойида бошланганди. Лойиҳа кўчани “Ғалаба боғи”дан Тошкент ҳалқа йўлигача бўлган 3,1 километр узунликдаги йўлни реконструкция қилишни назарда тутади.
“Келес йўлини таъмирлаш ишлари натижасида, йўлнинг қатнов қисми кенгайтирилиб, 6 полосали бўлади, пиёдалар ва велойўлаклар ташкил этилади, йўлнинг чекка қисмларида иқлимга мослашган чинор, каштан дарахтлари экилиб, суғориш ва дренаж тизимлари ўрнатилади”, — дейилган эди хабарда.
Изоҳ (0)