Toshkent shahrida transport infratuzilmasini takomillashtirish, piyodalarning xavfsiz harakatlanishiga sharoit yaratish maqsadida, shuningdek, aholidan kelib tushayotgan murojaat va takliflarga asosan, Olmazor tumanida joylashgan Keles yo‘li ko‘chasini to‘liq ta’mirlash loyihasi ishlab chiqildi. Bu haqda tuman hokimligi matbuot xizmati xabar berdi.
Ma’lum qilinishicha, ta’mirlash ishlari Toshkent shahar mahalliy budjetining qo‘shimcha daromadlari hisobidan amalga oshiriladi.
Loyihani ishlab chiqishda, ushbu ko‘chada joylashgan umumiy o‘rta va maktabgacha ta’lim muassasalari, masjidlar, boshqa tashkilotlarga qatnovchi aholi xavfsizligini ta’minlashga, muammoli chorrahalarda qo‘shimcha svetofor va yo‘l belgilarini o‘rnatishga alohida e’tibor qaratilgan. Barcha chora-tadbirlar Davlat ekologiya va atrof-muhitni muhofaza qilish qo‘mitasi, Uy-joy kommunal xizmat ko‘rsatish hamda Transport vazirliklarining mutaxassislarini jalb qilgan va ushbu tashkilotlar bilan kelishilgan holda ishlab chiqilib, amalga oshirilmoqda.
“Keles yo‘lini ta’mirlash ishlari natijasida, yo‘lning qatnov qismi kengaytirilib, 6 polosali bo‘ladi, piyodalar va veloyo‘laklar tashkil etiladi, yo‘lning chekka qismlarida iqlimga moslashgan chinor, kashtan daraxtlari ekilib, sug‘orish va drenaj tizimlari o‘rnatiladi”, — deyiladi xabarda.
Avvalroq Toshkentning Mustaqillik shohko‘chasidan o‘tgan tunnel rekonstruksiya qilinayotgani to‘g‘risida xabar berilgandi. Rekonstruksiya davomida tunnel devorlari fibro beton bilan qoplanadi, yoritish tizimi ta’mirlanadi.
Izoh (0)