Шавкат Мирзиёев Пекин шаҳрига амалий ташриф доирасида ўзига ажратилган қароргоҳда State Grid йирик энергетика холдинги раиси Син Баоанни қабул қилди.
Президент матбуот хизматининг маълум қилишича, Хитойнинг электр тармоқлари корпорацияси ушбу соҳадаги глобал етакчи бўлиб, Fortune Global 500 рейтингида юқори ўринларни эгаллаб келмоқда. Компания электр узатиш тармоқларини барпо этиш ва уларни эксплуатация қилиш бўйича кенг кўламли лойиҳаларни амалга ошириш борасида, шу жумладан хорижий мамлакатларда катта тажрибага эга. Активлари қиймати 800 миллиард доллар атрофида.
Ушбу компания иштирокида истиқболли лойиҳаларни амалга ошириш, жумладан, юқори волтли электр узатиш линияларини қуриш ва инфратузилма объектларини модернизация қилиш, бунда илғор инжиниринг ечимлари ва юксак технологияларни жорий этиш масалалари муҳокама қилинди.
Ўзбекистон энергетика тармоғи учун юқори малакали мутахассисларни тайёрлашга алоҳида эътибор қаратилди. Қўшма лойиҳаларни жадаллаштиришга қаратилган “йўл харитаси”ни қабул қилишга келишиб олинди.
Изоҳ (0)