Шавкат Мирзиёев 18 октябрь куни Пекин шаҳрида China CAMC Engineering компанияси раиси Ван Бони қабул қилди. Бу ҳақда Президент матбуот хизмати хабар берди.
CAMCE Хитойнинг инжиниринг хизматларини кўрсатувчи ҳамда саноат ва инфратузилма соҳаларида йирик инвестиция лойиҳаларини амалга оширувчи етакчи корпорациясидир. Компания Ўзбекистонда катта иш тажрибасига эга. Бугунги кунда CAMCE 2025 йилда Ўзбекистонда ўтказиладиган ёшлар ўртасидаги Осиё ўйинларига тайёргарлик доирасида олимпия шаҳарчаси қурилишида иштирок этмоқда.
Учрашувда қўшма лойиҳаларни кўпайтиришнинг амалий жиҳатлари, жумладан, мамлакат ҳудудларида гидротехник иншоотлар ва Янги Тошкентда замонавий инфратузилмани барпо этиш, илғор агротехнологияларни жорий қилиш масалалари муҳокама қилинган.
Давлат раҳбари қўшма лойиҳалар ва эришилган келишувларни амалга оширишни жадаллаштириш бўйича алоҳида “йўл харитаси”ни қабул қилишга топшириқ берди.
Эслатиб ўтамиз, Шавкат Мирзиёев 5-сентябрь куни Янги Тошкент шаҳрининг бош режаси лойиҳаси билан танишганди. Ушбу лойиҳа учун Тошкент вилоятининг Юқори Чирчиқ ва Ўрта Чирчиқ туманларидан 19 минг 720 гектар ер танлаб олинган. Биринчи босқичда 2,5 минг гектарда 100 минг аҳоли учун уй-жойлар ва инфратузилма объектлари қуриш режалаштирилган.
Изоҳ (0)