Қозоғистоннинг Олмаота вилоятида “Ушқўнғир сув хўжалиги коллежи” давлат мулкига қайтарилди, деб хабар бермоқда “Бешинчи ҳудуд” нашри. Коллежга мамлакат собиқ президенти Нурсултон Назарбоевнинг синглиси Анипа Назарбоева эгалик қиларди.
Нашр маълумотларига кўра, 2022 йил сентябрда Олмаота вилояти молия бошқармаси Анипа Абишевна Назарбаевага қарашли “Анипа” якка тадбиркорлик корхонаси устидан судга шикоят қилган.
Маълум бўлишича, 2016 йилда коллеж Олмаота вилояти молия бошқармаси томонидан “Анипа” корхонасига сотиб олиш ҳуқуқи билан ишончли бошқарувга топширилган.
Суд даъвогарнинг шикоятини қаноатлантирди ва 2016 йилги шартномани бекор қилишга қарор қилди.
Бундан ташқари, суд Анипа Назарбоевадан 3 450 тенге (75 доллар) миқдорида давлат божи ундириш ҳақида қарор чиқарди.
Аввал Назарбоевнинг собиқ келини 7 йилга озодликдан маҳрум қилинганди. У бирданига бир нечта моддалар бўйича айбдор деб топилган.
- Эслатиб ўтамиз, август бошида The Times нашри Британияда Назарбоевнинг қизи ва куёвига тегишли 50 миллион долларлик кўчмас мулклар ҳақида хабар берди.
- Офшор компаниялар орқали Қозоғистон собиқ раҳбарининг оиласига тегишли бўлган Лондондаги кўчмас мулк ҳақидаги маълумотлар Британия ҳукумати томонидан юритиладиган хорижий компанияларнинг бенефициар эгалари давлат реестри туфайли оммага ошкор бўлди.
Изоҳ (0)