Samarqandda 16—20-oktyabr kunlari BMT Butunjahon turizm tashkiloti (UNWTO) Bosh assambleyasining 25-sessiyasi bo‘lib o‘tadi.
Turizm qo‘mitasi matbuot xizmatining xabar berishicha, Bosh assambleyaning bu galgi sessiyasida dunyoning barcha qitʼalaridan 130 dan ortiq davlat ishtirok etadi. Bu Bosh assambleyaning avvalgi sessiyalariga nisbatan yuqori ko‘rsatkich hisoblanadi.
Qo‘mita xabarida qayd etilishicha, ushbu nufuzli tadbirning O‘zbekistonda o‘tkazilishi dunyo hamjamiyatining mamlakatga bo‘lgan eʼtiborini yanada kuchaytiradi. Negaki Bosh assambleya tadbirlariga Butunjahon turizm tashkilotiga aʼzo barcha davlatlarning ommaviy axborot vositalari, investorlar tashrif buyuradi va barcha uchun muhim hisoblanadi.
O‘zbekiston sayyohlik brendining Buyuk Britaniyadagi elchisi Sofi Ibbotson ushbu tadbirning O‘zbekiston uchun ahamiyati haqida fikr bildirdi.
“UNWTO Bosh assambleyasi 25-sessiyasi O‘zbekiston uchun ikkita muhim ahamiyatga ega. Bu yerda birinchi navbatda butun dunyodan sayyohlik tashkilotlari vakillari yig‘iladi. Tadbirga UNWTO’ga aʼzo mamlakatlardan 160 delegatsiya ishtirok etishi kutilmoqda. Bu O‘zbekistonga nafaqat xalqaro turizm sohasiga hissa qo‘shish, balki kelgusi ikki yil davomida uni shakllantirish imkoniyatini ham beradi”, — dedi u.
Uning qayd etishicha, ushbu tadbir muhimligining yana bir sababi shundaki, O‘zbekiston o‘zining mehmondo‘stligi va MICE turizmi yo‘nalishini namoyish etish imkoniyatiga ega bo‘lmoqda (MICE — bu biznes uchrashuvlari doirasidagi konferensiyalar va tadbirlardir).
Sofi Ibbotson O‘zbekistonning qaysi turistik yo‘nalishlari Yevropa Ittifoqi davlatlaridan chet ellik sayyohlarni jalb etishi haqida ham gapirdi.
“O‘zbekistonga sayohat qilish xorijlik sayyohlar uchun jozibador, hayajonli, o‘ta ekzotik, shu bilan birga, juda xavfsiz va hamyonbopdir. Shuningdek, turli milliy mahsulotlar ham sayyohlarning eʼtiborini jalb qiladi.
UNWTO Bosh Assambleyasi doirasida “Eng yaxshi turizm qishloqlari” nominatsiyasi bo‘yicha taqdirlash marosimi ham o‘tkaziladi. Bu ro‘yxatga O‘zbekistonning beshta turizm qishlog‘i ham kiritilgani quvonarlidir. Turizm qishloqlari — O‘zbekiston uchun mahalliy va xorijlik sayyohlarga qishloq aholisi hamda ularning turmush tarzi bilan muloqot qilish imkonini beruvchi ajoyib yangi yo‘nalishdir”, — dedi u.
UNWTO Bosh assambleyasi doirasida Samarqandda Xalqaro Investitsiya forumi, Xalqaro taʼlim forumi, “Eng yaxshi turizm qishloqlari”ni taqdirlash marosimi, shuningdek, qator yalpi sessiyalar va madaniy tadbirlar bo‘lib o‘tadi.
Izoh (0)