Жиззахлик тадбиркор Қашқадарёдан Жиззахга ўзига тегишли бўлган 60 тонна чигитни олиб чиқишда тақиққа учрагани ҳақида хабарлар тарқалди. ЎзЛиДеП ҳолат юзасидан муносабат билдирди.
Тадбиркорнинг маълум қилишича, чигит юкланган юк машинаси вилоят ҳокимлигининг оғзаки буйруғи билан 5 кундан бери “Умакай” ЙПХ масканида ушлаб турилибди. Ушбу ҳодиса партия фаоллари ва депутатлар томонидан қўшимча равишда ўрганилмоқда.
Айни пайтда масаланинг долзарблигидан келиб чиққан ҳолда Ўзбекистон Либерал-демократик партияси мазкур вазиятга ўз расмий муносабатини билдиришни лозим деб билади. Конституциянинг 67-моддасида Ўзбекистон ҳудудида иқтисодий макон бирлиги, товарлар, хизматлар, меҳнат ресурслари ва молиявий маблағларнинг эркин ҳаракатланиши кафолатланиши аниқ белгилаб қўйилган.
“Шундай экан, Конституция ва қонунларга асосланмасдан на ички ишлар ходимларининг, на ҳокимият вакилларининг товарларнинг эркин ҳаракатланишини чеклашга ҳеч қандай ваколати йўқ. Бу борада Олий Мажлис Қонунчилик палатасидаги партия фракцияси аъзолари томонидан Ички ишлар вазирлиги ва Қашқадарё вилояти ҳокимиятига тегишли депутатлик сўровлари юборилди”, — дейилади хабарда.
Қуйида Олий Мажлис Қонунчилик палатасидаги ЎзЛиДеП партияси фракцияси аъзолари бўлган депутатлар Тўлқин Каримов ҳамда Батирбек Тўразодалар томонидан Ички ишлар вазирлиги ва Қашқадарё вилояти ҳокимлигига юборган депутатлик сўровлари келтирилган.
Изоҳ (0)