Тошкент шаҳрининг Яшнобод туманидаги “Тўйтепа” маҳалласи Содиқ Азимов кўчасида жойлашган 20-уйда яшовчи аҳоли вакиллари тадбиркордан норози бўлиб, Бош прокуратура олдида кўриниш берди. Бош прокурор билан учрашмоқчилигини айтган мурожаатчилар орасида ёлланган кишилар борлиги тахмин қилинмоқда. Бу ҳақда “Дарё”га маҳалла раиси Баҳодир Ризаев маълум қилди. 

МФЙ раисига кўра, Бош прокуратура биноси олдида тўпланганлардан уч-тўрт нафаригина шу маҳаллада истиқомат қилади.

Уларнинг уч-тўрт нафари бизнинг маҳаллада яшовчи фуқаролар, қолгани шахсан менга нотаниш фуқаролар. Боиси маҳалла раиси сифатида маҳалламизда ким истиқомат қилишини яхши биламан ва ҳар бир фуқарони танийман, — дейди “Тўйтепа” МФЙ раиси Баҳодир Ризаев. 

Раиснинг айтишича, туман ҳокими Бош прокуратура олдида тўпланиб, муаммо ҳақида шикоят қилганлар билан учрашиб, муаммони ҳал этишга киришган. Бироқ, мурожаатчилар орасида жуда камчилик маҳалла аҳолиси эканига гувоҳ бўлган. 

Аҳолининг бу ҳақдаги шикояти Олий судгача чиқиб, ер ва автотураргоҳ эгалиги тадбиркорники эканлиги исботлаган. Яъни буни суд ҳам тасдиқлаган. Шунга қарамасдан аҳоли болалар майдончаси бузилиб, тадбиркор ерни олиб қўйишидан, шунча йиллар давомида фойдаланиб келинган автотураргоҳ олиб қўйилишидан норози бўлмоқда, — дейди МФЙ раиси муаммо нимадан чиққанига аниқлик киритган раис. 

Тадбиркор томон вакили Улуғбек Мирзаевнинг ОАВ вакилларига маълумот беришича, Содиқ Азимов кўчасидаги 20-уй 2009 йил тадбиркор томонидан қурилган.

Аслида бу жой тадбиркор Обидхон ака Муҳаммедовники ҳисобланади. У киши бу ерни 2005 йилда аукциондан сотиб олиб, рухсатномаларни расмийлаштирган ҳолда кўп қаватли уй қурилишини бошлаган. Уй 2009 йилда 48 та хонадондан иборат шаклда фойдаланишга топширилган. Уйнинг ерости қисмида 42 та автомобилга мўлжалланиб, автотураргоҳ ҳам қурилган. Бироқ ўша йили ҳокимлик қарори билан фақат турар жойга нисбатан эгалик ҳуқуқи эътироф этилган. Нотурар жойлар — автотураргоҳ, қоровулхона ва омборхоналарга эса эгалик ҳуқуқи берилмай қолиб кетган. 2018 йилда ҳокимликка шу камчиликни тузатиш бўйича мурожаат қилиниб, 2019 йилда нотурар жойлар қайтадан фойдаланишга топширилиб, уларга мулк ҳуқуқи берилди, — дейди тадбиркорнинг ишончли вакили, адвокат Улуғбек Мирзаев. 

Раиснинг журналистларга тушунтириш беришича, аҳолининг кам қисми 20-уй олдида жойлашган болалар майдончаси ҳамда кўп қаватли уйнинг ерости қисмидан жой олган автотураргоҳ қонуний эгасига ўтиб кетишидан норози. Айтилишича, тадбиркор-қурувчи аҳоли унга тегишли ерга ўзбошимчалик билан болалар майдончаси қуриб олгани, йиллар давомида унга тегишли автотураргоҳдан бепул фойдаланиб келишига қарамасдан, эндиликда буларни ўзиники қилишга уринаётганидан ранжиган.

Ҳозирги сиёсатимизни ўзингиз ҳам яхши биласиз, одатда болалар майдончаси бўлган жойлар бузилмасин дейилади. Шуни яхши билган аҳоли 2005 йилда лойиҳаси тузилган ер майдонига 2019—2020 йилларда кўп қаватли уй қуришимизни билгач, 2021 йилда ўзбошимчалик билан болалар майдончасини қуриб олган. Ўша пайтда тадбиркор бу ер унга тегишли эканини айтиб, аҳолини ўзбошимчалик қилмасликка чақирган. Лекин бунинг фойдаси бўлмаган. Бугунги кунга келиб эса аҳоли вакиллари тадбиркор болалар майдончасини бузиб ташламоқда деган гапни айтишмоқда. Аслида бу ер тадбиркорга тегишли ер бўлган, — дейди ишончли вакил.

Улуғбек Мирзаевнинг қўшимча қилишича, аҳоли тадбиркорга тегишли ерда болалар учун ўйингоҳ қурмоқчилигини айтиб, ҳокимликка мурожаат қилган. Ҳокимлик сўралган пайтда бузиб ташлаш шарти билан, енгил конструкцияли болалар майдончаси қурилишига қаршилигимиз йўқ деган мазмунда жавоб хати берган.

Аҳоли ҳокимиятнинг айнан шу жавоб хатини бизга болалар майдончаси қурилишига ҳокимият рухсат берган деб олиб юрибди. Ваҳоланки, ҳокимлик биринчи талаб қилинган пайтдаёқ бузиб ташлаш шарти билан енгил конструкцияли болалар майдончаси қурилишига қаршилигимиз йўқ деган, — дейди у.

Журналистлар билан мулоқотда бўлган аҳоли вакилларидан бири B.Балаян ўзига тегишли хонадонни 2009 йил сотиб олганини, уйни сотиб олаётганда унга “бир хонадонга битта автотураргоҳ” деган ваъда билан сотишганини, бироқ уйнинг олди-сотди шартномасида бу акс этмаганини айтмоқда. 

Ҳужжатларга яхши тушунишини айтаётган аҳоли вакилига кўра, у уйнинг олди-сотди шартномасида автотураргоҳ ҳақида ҳеч нарса ёзилмаганини айтиб, шартнома тузувчилардан бу ҳақда сўраганини, аммо Аброр исмли юристидан ҳам тайинли жавоб ололмаганини таъкидламоқда. У мазкур муаммони кўриб чиққан судларни адолатсизликда айбламоқда.

B.Балаян ҳудуддаги уй ва унга тегишлилиги айтилаётган автотураргоҳ эгаси эканини таъкидласа-да, буни исботловчи ҳужжатлар тақдим этолмади. Ернинг асл эгаси эканини таъкидлаётган тадбиркор вакили Улуғбек Мирзаев эса ер 2005 йил сотиб олинганини тасдиқловчи ҳужжатдан тортиб, ерга қурилиш қилишга рухсат берувчи ҳужжат, қурилган уйнинг эгалик ҳуқуқини берувчи кадастр ҳужжати ва автотураргоҳдан бепул фойдаланиб келинганини тасдиқловчи актларни ҳам тақдим қилди.

Мақолада бежиз “Ким ҳақ? Тадбиркорми ёки аҳоли?” деган саволни ўртага ташламадик. Келтирилган маълумотлар ва далиллар орқали зукко ўқувчи мақола сўнгида саволга жавоб беришга қийналмаса керак.

“Дарё” ҳар икки томонга қўшимча маълумотлар тақдим этиш учун минбар беришга тайёрлигини билдиради ва лозим топилса, албатта мавзуга қайтади.