Ўзбекистон илк бор 4,25 триллион сўм миқдоридаги яшил суверен халқаро облигациялар ҳамда 660 миллион доллар миқдоридаги халқаро облигацияларни Лондон фонд биржасида жойлаштирди. Бу ҳақда Иқтисодиёт ва молия вазирлиги хабар берди.
Яшил облигациялар бўйича келиб тушадиган маблағлар сув тежовчи технологияларни жорий қилиш, темирйўл транспорти ва метро транспортини ривожлантириш, санитар тозалаш ишларини ташкил этиш ва аҳоли пунктларида тозаликни таъминлаш, шамол эрозиясига ва сув хўжалиги объектларининг қум босишига қарши иҳота дарахтзорлари барпо этиш каби яшил лойиҳаларни молиялаштириш учун йўналтирилади.
Бунда лойиҳаларни танлаб олиш жараёнига Бирлашган миллатлар ташкилотининг ривожланиш дастури (UNDP) жалб қилинган. Яшил облигациялар дастури бўйича Sustainalytics томонидан иккинчи тараф ижобий хулосаси олинган.
Ўзбекистоннинг миллий валютадаги “яшил” облигацияларига бўлган юқори талабни инобатга олиб, 3 йиллик сўмдаги халқаро облигацияларнинг фоиз ставкаларини (купон тўлови) кутилган 18 фоиздан 16,25 фоизга туширишга муваффақ бўлинди. Мазкур транзакция билан сўндириш муддати 2023 йилнинг 23 ноябрь куни бўлган 1,9 триллион сўм миқдоридаги халқаро облигациялар муддатидан олдин сўндирилган.
Ички молия бозорларида сўнгги ўтказилган аукционда (26 сентябр) 2 йиллик давлат қимматли қоғозлари бўйича фоиз ставкалари 17,57 фоизни ташкил қилган.
Иккиламчи бозор котировкалари ҳамда инвесторлар таклифларидан келиб чиқиб, АҚШ долларидаги Ўзбекистон Республикасининг 5 йиллик суверен халқаро облигациялари учун дастлабки фоиз ставкаси 8,50–8,625 фоиз оралиғида эълон қилинди.
Иккиламчи бозорда Ўзбекистоннинг 2029 йилда сўндириладиган халқаро облигациялари фоиз ставкаси 8,1 фоизга етган. Хусусан, сўнгги бир ҳафтада (27 сентябр – 7,67 фоиз) фоиз ставкалари 0,43 фоизга ошган. Буюртмалар китоби 1,7 миллиард долларга етганда, фоиз ставкаларни 8,25-8,375 фоизга туширишга эришилган.
“Якуний талаб 2 миллиард долларга етгач, 660 миллион доллар миқдоридаги облигациялар 8,125 фоиз ставкада ҳамда 7,85 фоиз купонда чиқарилди. Мазкур купон ставкаси молиявий маслаҳатчилар томонидан тавсия этилиб, халқаро облигацияларни инвесторларга 98,888 фоиз нархда сотилишини англатади (яъни мазкур транзакциядан 652,6 миллион доллар маблағ келиб тушади)”, — дейилади хабарда.
Қайд этилишича, бугунги кунда жаҳон молия бозорларида фоиз ставкаларининг ошиши кузатилмоқда. Хусусан, 5 йиллик АҚШ Ғазначилик облигациялари фоиз ставкалари 2021 йил июль (сўнгги марта суверен облигациялар чиқарилган давр) ойига нисбатан қарийб 4 фоизга ошиб, 2021 йил июль ойидаги 0,8 фоиздан 4,7 фоизга етган.
Жаҳон молия бозорларидан фоиз ставкаларининг ошиши, мос равишда, халқаро молия институтларининг имтиёзли фоиз ставкаларининг ҳам кескин ошишига сабаб бўлмоқда. Халқаро кредит бозорларида ишлатиладиган COFP (олдин LIBOR) ставкаси 2021 йил июль ойидан бери 0,17 фоиздан қарийб 5,3 фоизга ошиб, бугунги кунда 5,5 фоизга етган.
Шунинг учун, халқаро молия институтлари томонидан жалб қилинаётган имтиёзли кредитлар бўйича фоиз ставкалар ҳам икки йил ичида 1-2 фоиздан бугунги кунга келиб 6,3-7,0 фоизга етган.
Жорий бозор шароитлари сабабли бошқа мамлакатлар ҳам олдингига нисбатан юқори фоиз ставкаларида давлат қарзини жалб қилмоқда. Мисол учун:
- Туркия 2023 йил январь ойида 2,75 миллиард долларга тенг 10 йиллик суверен халқаро облигацияларини 9,75 фоиздан;
- Венгрия январь ойида 1,25 миллиард долларга тенг 30 йиллик облигацияларни 7,1 фоиздан;
- Руминия январь ойида 1,25 миллиард долларга тенг 30 йиллик облигацияларни 7,67 фоиздан;
- Мўғулистон январь ойида 445 миллион долларга тенг 5 йиллик халқаро облигацияларни 8,65 фоиздан;
- Миср февраль ойида 1,5 миллиард долларга тенг 3 йиллик суверен халқаро облигацияларни 11 фоиздан;
- Баҳрайн апрель ойида 1 миллиард долларга тенг 12 йиллик 7,75 фоиздан жойлаштирган.
Яшил облигацияларни жойлаштиришдан тушган келиб тушган маблағларнинг сарфланиши юзасидан ҳисобот халқаро стандартларга мувофиқ шакллантирилади ва эълон қилиб борилади.
Изоҳ (0)