Ўзбекистондаги банклардан бирига банк операцияларини амалга ошириш тақиқланди

Марказий банк “АВО банк” (собиқ “Ўзагроэкспортбанк”) депозит ва кредит операциялари тўхтатилганини маълум қилди.

Қайд этилишича, “Банклар ва банк фаолияти тўғрисида”ги қонунга мувофиқ, банк устав капиталининг энг кам миқдори 2023 йил 1 сентябрдан эътиборан 200 млрд сўмни ташкил этиши кераклиги белгиланган.

“Бугунги кун ҳолатига “АВО банк”нинг устав капитали 105 млрд сўмни ташкил этган ҳолда банк устав капитали миқдори қонунчилик талабларига мувофиқлаштирилмаган. Банклар ва банк фаолияти тўғрисидаги қонунчиликка мувофиқ, Банк назорати қўмитаси қарорига асосан банкка нисбатан кредитлаш ва бошқа харажатларни молиялаштириш ҳамда депозит операцияларини амалга ошириш тақиқланди”, — дейилади Марказий банк хабарида.

Маълумот учун, 2022 йил декабрда “Ўзагроэкспортбанк” (ҳозирги “АВО банк”) устав капиталидаги 100 фоиз давлат акциялар пакети Support Level МЧЖга ҳеч қандай тендерсиз 5 миллион долларга сотилганди.

Жорий йилнинг 13 сентябр куни Марказий банк “Ўзагроэкспортбанк” АТБ номи “АВО банк”га ўзгарганини ва банкка берилган лицензия қайта расмийлаштирилганини маълум қилган.