Иқтисодий тадқиқотлар ва ислоҳотлар маркази Ўзбекистоннинг Россия билан савдо ҳажмини таҳлил қилди. Ҳисоб–китобларга кўра, охирги 6 йилда икки давлат ўртасидаги товар айирбошлаш ҳажми 2017 йилдаги 4,73 миллиард доллардан 2022 йилда 9,33 миллиард долларга, экспорт 2,0 миллиард доллардан 3,1 миллиард долларга 1,5 баробарга, импорт 2,3 баробарга, 2,7 миллиард доллардан 6,23 миллиард долларга ўсган.
2022 йилда Ўзбекистоннинг Россия билан товар айирбошлаш ҳажми 23,6 фоизга ўсиб, 9,3 миллиард долларни ташкил этди, экспорт эса сезиларли даражада 48,4 фоизга ўсиб, 3,1 миллиард долларни, импорт 14,1 фоизга ўсиб, 6, миллиард долларни ташкил этди.
Ўзбекистоннинг ташқи савдо ҳамкорлари орасида ўзаро савдо ҳажми бўйича 2022 йилда Россия 18,6 фоиз товар айирбошлаш улуши билан биринчи ўринни эгаллаган бўлса, Ўзбекистон экспортида Россиянинг улуши 16,1 фоиз, импортда эса 20,3 фоизни ташкил этди.
Жорий йилнинг 8 ойи давомида Ўзбекистоннинг Россия билан савдо айланмаси ўтган йилнинг шу даврига нисбатан 7,4 фоизга (6,1 миллиард долларга), экспорт 5,1 фоизга (1,9 миллиард долларга), импорт 8,5 фоизга (4,2 миллиард долларга) ўсди. Ўзбекистоннинг умумий ташқи савдо айланмасида Россиянинг улуши 15,4 фоиз, экспортдаги улуши 12 фоиз, импортдаги улуши 17,8 фоизни ташкил этди.
Жорий йилнинг январь август ойларида Ўзбекистоннинг савдо шериклари бўлган мамлакатлар орасида товар айирбошлаш ҳажми бўйича Россия 15,4 фоиз ( Хитой биринчи ўринда - 20,7 фоиз) улуши билан иккинчи ўринни эгаллади. Шу билан бирга, Россия 12 фоиз улуш билан Ўзбекистон экспортининг умумий ҳажмида биринчи ўринни эгаллади (экспортдаги Хитой улуши -10,6 фоиз).
Ўзбекистон Россияга тўқимачилик маҳсулотлари ва кийим-кечак, янги ва қайта ишланган мева-сабзавот маҳсулотлари, кимё маҳсулотлари, айрим турдаги саноат ва бошқа тайёр маҳсулотлар, шунингдек хизматлар экспорт қилади. Масалан, жорий йилнинг январь август ойлари якунларига кўра, қишлоқ хўжалиги маҳсулотларининг умумий експортининг 42 фоизи Россияга экспорт қилинди.
Ўз навбатида, Ўзбекистон Россиядан саноат товарлари, шу жумладан, қора ва рангли металлар, улардан тайёрланган маҳсулотлар, механик ва электр жиҳозлари, ёғоч, нефть маҳсулотлари, кимё маҳсулотлари, озиқ-овқат маҳсулотлари ҳамда хизматларни импорт қилади. Масалан, жорий йилнинг январь август ойлари якунларига кўра, Ўзбекистон саноат маҳсулотлари умумий импортида ушбу турдаги маҳсулотлар импортининг 35,2 фоизи Россия ҳиссасига тўғри келди.
2023 йил 1-сентябр ҳолатига Россия Ўзбекистонда ташкил этилган хорижий инвестициялар иштирокидаги корхоналар сони бўйича биринчи ўринда туради – 2849 корхона ёки хорижий инвестициялар иштирокидаги фаолият кўрсатаётган корхоналар умумий сонининг 22,3 фоизи. Шунингдек, Россия жорий йилнинг январь август ойларида хорижий инвестициялар иштирокидаги янги ташкил этилган корхоналар сони бўйича ҳам етакчи ҳисобланади – 425 корхона.
Жорий йилнинг биринчи ярмида Россия ўзлаштирилган хорижий инвестициялар ва кредитлар умумий ҳажмининг 18,8 фоизини ташкил этди. Ўзбекистон иқтисодиётига тўпланган Россия инвестицияларининг умумий ҳажми 10 миллиард доллардан ошади.
Изоҳ (0)