Ўзбекистонда пенсия олаётган II жаҳон уруши қатнашчилари ҳақида маълумот берилди

Ўзбекистонда 1941-1945 йиллардаги уруш қатнашчиси ва ногирони сифатида Пенсия жамғармаси ҳисобида туриб, пенсия олаётган нуронийлар сони 97 нафарни (шундан 11 нафари аёллар) ташкил қилади. Бу ҳақда жамғарма маълумот берди.

Қайд этилишича, пенсионерлардан 28 нафари 100 ёшга тўлган ва ундан катта, 13 нафари 99 ёшга, 31 нафари 98 ёшга тўлган. Шунингдек, 21 нафари 97 ёшга тўлган, 2 нафари 96 ёшга, қолган 2 нафари 95 ва 94 ёшларга тўлган.

Пенсия жамғармаси 1941-1945 йиллардаги уруш қатнашчилари ва ногиронларига пенсиясидан ташқари тўланаётган устама ҳақ, компенсация ва қўшимчалар тўғрисида ҳам ахборот берди.

Маълум қилинишича, уларга ҳар ойда пенсияни ҳисоблаш базавий миқдорининг 150 фоизи миқдорида устама ҳақ (520 минг 500 сўмдан) тўланади.

100 ёшга тўлган ва 100 ёшдан катталарга ҳар ойда пенсияни ҳисоблаш базавий миқдорининг 100 фоизи миқдорида – 347 минг сўм, пенсияни ҳисоблаш базавий миқдорининг 50 фоизи миқдорида уй-жой коммунал хизматлар ҳақини тўлаш учун компенсация пули 173 минг 500 сўмдан тўлаб борилади.

Шу билан бирга, ҳар ойда БҲМнинг 100 фоизи миқдорида озиқ-овқат маҳсулотлари ва гигиена маҳсулотлари ўрнига қўшимча тўлов (330 минг сўм), бир йилда бир маротаба БҲМнинг 1500 фоизи миқдорида бепул етказиб бериладиган кийим бош ҳамда оёқ кийим товарлари ўрнига компенсация пули – 4 миллион 950 минг сўм тўланади.

Эслатиб ўтамиз, ҳозир Ўзбекистонда 4,5 миллион нафар пенсия ва нафақа олувчилар бор. Давлат пенсияларининг барча турлари учун йиллик 53,5 триллион сўм тўланмоқда. Бунда бир ойлик ўртача харажатлар миқдори қарийб 4,5 триллион сўмни ташкил этади. Жорий йил 1 июль ҳолатига республикада энг юқори иш ҳақи билан пенсия (ҳисобланган) тайинланган фуқаролар 401,9 минг нафарни ва энг кам миқдорда пенсия олувчилар 652,9 минг нафарни ташкил этган.

Ҳозирда мамлакатда энг кам миқдордаги пенсиялар қуйидагича:

• Ёшга доир энг кам пенсия – 677 000 сўм;
• Ногиронлик пенсиялари, жумладан, иш стажи тўлиқ бўлмаган чоғдаги ногиронлик пенсиясининг энг кам миқдори – 747 000 сўм;
• Меҳнатга лаёқатсиз фуқароларга бериладиган ногиронлик нафақаси ва болаликдан ногиронлиги бўлган шахсларга бериладиган нафақа миқдори – 747 000 сўм;
• Белгиланган ёшга доир энг кам пенсия миқдоридан (677 000 сўмдан) 747 000 сўмгача пенсия олувчиларнинг ёшга доир пенсиялари – 747 000 сўм.