Жаҳон банки 2023—2024 йил учун Ўзбекистон иқтисодий ўсиши бўйича прогнозини яхшилади. Бу ҳақда банкнинг Европа ва Марказий Осиё минтақаси иқтисодиёти бўйича эълон қилган ҳисоботида келтирилган.
Жаҳон банки ҳисоб-китобларига кўра, Ўзбекистон ялпи ички маҳсулотининг ўсиши 2023 йилда 5,5 фоизга яқинлашади. У ўрта муддатли истиқболда босқичма-босқич тезлашиб, 2024 ва 2025 йилларда мос равишда 5,6 ва 5,8 фоизга етиши мумкин. 2023 йилда истеъмол даражаси ўсиши секинлашади, бу Россиядан пул ўтказмалари ҳажмининг пасайиши билан боғлиқ.
Қайд этилишича, 2023 йилда импорт ўсиши тезлашиши кутилмоқда. Иқтисодиётни модернизация қилиш суръатларини сақлаб қолиш учун унинг ҳажми ўрта муддатли истиқболда ўсишда давом этади. Пул ўтказмалари ҳажмининг қисқариши билан мамлакатнинг жорий ҳисоби дефицити биринчи ярим йилликда 6,3 фоизга етди ва ўсишда давом этади.
“Энергетика соҳасига юқори харажатлар, давлат секторида таълим, иш ҳақи, пенсия ва нафақаларга кўпроқ харажат қилиниши ҳамда даромадларнинг камайиши ҳисобига 2023 йилда бюджет тақчиллиги ЯИМнинг 5 фоизигача ошиши прогноз қилинмоқда”, — дейилади ҳисоботда.
Ҳукумат ўрта муддатли истиқболда бюджетни консолидациялаши, бюджет тақчиллигини 2024 йилда ялпи ички маҳсулотнинг 4 фоизигача, 2025 йилда эса 3,6 фоизигача камайтириши кутилмоқда. Бу давлат корхоналари учун солиқ имтиёзларини қисқартириш, энергетик субсидиялар харажатларини камайтириш, шунингдек, давлат активларини хусусийлаштиришдан молиявий тушумларнинг кўпайиши билан боғлиқ бўлади.
Ҳукумат, шунингдек, ташқи қарз олиш бўйича ўз чекловларига риоя қилиши кутилмоқда. Шу сабабли давлат қарзи 2023 йилда ялпи ички маҳсулотнинг 36 фоизигача ўсади ва 2024 йилда 36,6 фоизни ташкил этади.
ЕТТБ, ХВЖ ва Жаҳон банки прогнозлари
Аввалроқ Европа тикланиш ва тараққиёт банки Ўзбекистон иқтисодиёти 2023 ва 2024 йилларда 6,5 фоизга ўсишини прогноз қилганди. Банк ўзининг минтақавий ҳисоботида ташқи боғлиқликнинг нисбатан кучсизланишига қарамай, Ўзбекистон иқтисодиётига Россиянинг Украинага қарши урушининг янада кучайиши ва пул ўтказмаларининг қисқариши қийинчилик туғдириши мумкинлиги қайд этилган.
- Халқаро валюта жамғармаси апрель ойидаги ҳисоботида Ўзбекистоннинг иқтисодий ўсиш прогнозини яхшилаган.
- Унга кўра, 2023 йилда Ўзбекистонда ЯИМ ўсиши 5,3 фоизни ташкил этиши кутилмоқда, октябр ойидаги прогнозда бу кўрсаткич 4,7 фоизни ташкил этган эди.
- Жаҳон банки Ўзбекистон кейинги икки йилда Европа ва Марказий Осиё минтақасидаги энг яхши иқтисодий ўсишга эга бўлишини билдирган.
- Республика иқтисодиёти ўсиш суръати 2024 ва 2025 йиллар учун мос равишда 5,4 ва 5,8 фоизни ташкилл этиши кутилмоқда.
Изоҳ (0)